Kásipkerlerdiń jol kartasy ázirlenedi
«Qazaqstandyq taýar óndirýshilerdiń barlyǵyn bir alańǵa jınaý - otandyq kásipkerlerge óndiris, qaıta óńdeý, salasynda tájirıbe almasyp, jańa baǵyttardy aıqyndaýǵa múmkindik berip, sapany arttyrýǵa yntalandyrady. Osy kúnderi qazaqstandyq taýarlardy nasıhattaý jáne olardy keńinen tanytý maqsatynda Ázerbaıjan, Koreıa, Malaızııa, Polsha, Túrkııa jáne Ózbekstan sekildi shet elderden kelgen bıznes delegatsııalarmen kezdesýler ótip, halyqaralyq qujattarǵa qol qoıylatynyn aıta ketý kerek. Bul - eksportqa taýar shyǵarýǵa áleýeti jetkilikti qazaqstandyq kásiporyndarǵa tyń serpin berip, eksporttyq sharttarǵa qol jetkizýge múmkindik beredi», - deıdi «Damý» qorynyń basqarma tóraıymy Gaýhar Bóribaeva.
6 mamyr kúni «Ulttyq ónim - 2019» kórmesi aıasynda «Damý» Qory men Ernst&Young Poland (Polsha) arasynda semınar ótip, startaptardyń zamanaýı ekojúıesin qurý jobasyn júzege asyrý barysy talqylanady. Sol kúni kásipkerlerge arnalǵan «Islam qarjysy: Qazaqstan ShOB qoldaý salasyndaǵy damýdyń balama baǵyty» atty semınar da ótedi.
«Damý» qory Qazaqstan kásipkerlerin qarjylaı qoldaýmen qatar, shet eldik áriptestermen bıznes-sharttar aıasyn keńeıtý, eksportty jandandyrý boıynsha memleket saıasaty aıasynda tehnologııalyq jáne óndiristik áleýetti kóterýge de basa mán beredi. «Ulttyq Onim» kórmesi halyqaralyq baılanystardyń arqasynda Qazaqstan bıznesine syrtqy naryqqa shyǵyp, halyqaralyq saýdany jandandyrýǵa múmkindik beredi», - dedi Gaýhar Bóribaeva óz sózinde.
Al «Damý» qorynyń Basqarma tóraıymynyń orynbasary Dáýlet Ábilqaıyrovtyń aıtýynsha, búgin ShOB-ty damytý boıynsha birqatar halyqaralyq agenttiktermen kelisimge qol qoıylady.
«Memorandýmdardan bólek, arnaıy Jol kartasy ázirlenedi. Demek, bul tek yntymaqtastyqty bildiretin qujattar ǵana emes, eksport pen ımport máselesin retteıtin, kásipkerlerge kómektesip, sheteldiktermen baılanys ornatýda qol ushyn sozatyn saty-saty saıynǵy tyǵyz jumys», - deıdi ol.
Eske sala ketsek, elordadaǵy Táýelsizdik saraıynda otandyq óndirýshilerdiń V kórmesi ótip jatyr. «Ulttyq ónim - 2019» kórmesiniń basty maqsaty - shaǵyn jáne orta kásipkerlik sýbektilerine qoldaý kórsetip, otandyq ónimniń nasıhatyn arttyrý.