Kásipkerlerdiń salyq pen tólemin azaıtý úshin ulttyq zańnamany tolyq tekserý bastaldy

NUR-SULTAN. QazAqparat – Zardap shekken sektordaǵy shaǵyn jáne orta bıznes úshin aınalymnan jekelegen salyq tóleý quqyǵy engiziledi. Bul týraly QR Premer-Mınıstriniń birinshi orynbasary Álıhan Smaıylov aıtty, dep habarlaıdy QazAqparat tilshisi.

«Salyq mindettemeleriniń oryndalýyn jeńildetý, salyqtar men tólemder sanyn azaıtý maqsatynda ulttyq zańnamaǵa tolyq tekserý júrgiziledi. Bul jumys bastalyp ta ketti. Barynsha zardap shekken sektordaǵy shaǵyn jáne orta bıznes úshin aınalymnan jekelegen salyq tóleý quqyǵy engiziledi. Ekonomıkany ártaraptandyrý jáne ıýdjetti tolyqtyrý úshin salyqtyq stavkany saralaý múmkindigi qarastyrylady», - dedi birinshi vıtse-premer Úkimet úıindegi baspasóz máslıhatynda.

Birinshi vıtse-premer Úkimet jańa bıýdjet saıasatyn ázirleýge jeke nazar aýdaratyndyǵyn aıtty.

«Basty bıýdjettik koeffıtsıentter men erejeler, tıimdilikti baǵalaý jáne bıýdjet saıasatynyń turaqtylyǵy jınaǵy ázirlenetin bolady. «Keńeıtilgen bıýdjet» engizý arqyly shoǵyrlandyrylǵan bıýdjetke bıýdjetten tys qorlardy qosý jolymen memlekettik qarjyny keshendi baǵalaý engizý josparlanyp otyr. Nátıjesinde bıýdjettik josparlaýdyń jańa tásilderi memlekettik josparlaý júıesindegi ulttyq basymdyqtardy barynsha tolyq júzege asyrýdy qamtamasyz etedi», - dedi Álıhan Smaıylov.