Kásipkerlerdiń problemaly nesıelerin qandaı kompanııalar senimgerlik jolmen basqara alady

NUR-SULTAN. QazAqparat – QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov kásipkerlerdiń problemaly ınvestıtsııalyq nesıelerin senimgerlik basqarýǵa alatyn kompanııalarǵa qandaı talap qoıylatynyn aıtty, dep habarlaıdy QazAqparat tilshisi.

«Servıstik kompanııalardyń fýnktsııalary tıisti tájirıbesi men quzyreti bar, bankterdiń strestik aktıvterdi basqarý jónindegi enshiles uıymdaryna jáne kollektorlyq agenttikterge beriledi. Sonymen qatar zań aıasyndaǵy deńgeıde servıstik kompanııalar úshin kapıtaldyń mólsheri, naryqtaǵy jumys tájirıbesi, minsiz iskerlik bedeliniń bolýy jáne qadaǵalaý sharalary men sanktsııalardyń bolmaýy jóninde joǵary talaptar belgilenedi. Agenttik belgilengen talaptarǵa sáıkes keletin servıstik kompanııalardyń tizilimin júrgizip, olar týraly aqparatty óziniń ınternet-resýrsynda ornalastyrady», - dedi ol ortalyq kommýnıkatsııalar qyzmetinde ótken brıfıngide.

Onyń paıymynsha, atalǵan kompanııalardyń qyzmeti qaryz alýshylardyń quqyqtaryn qorǵaýdyń qosymsha tetigin qamtamasyz etýge múmkindik beredi.

Ol uıymdardyń jumysyn Qarjy naryǵyn retteý jáne damytý agenttigi rettep otyrady.