Kásipkerlerdiń áleýmettik jaýapkershiligi artyp keledi - Abzal Muhımov

NUR-SULTAN. QazAqparat - «Rýhanı jańǵyrý» baǵdarlamasyna qatysatyn kásipkerler sany jyldan-jylǵa artyp keledi. Bul týraly búgin Ortalyq kommýnıkatsııalar qyzmetinde «Rýhanı jańǵyrý» baǵdarlamasyn iske asyrý jónindegi Ulttyq komıssııa otyrysynyń nátıjesine arnalǵan brıfıngte aıtyldy, dep habarlaıdy QazAqparat.

«Jańa ǵana Aqordada QR Memlekettik hatshysy Qyrym Kósherbaevtiń tóraǵalyǵymen Ulttyq komıssııanyń bıylǵy alǵashqy otyrysy ótti. QR Tuńǵysh Prezıdenti - Elbasy Nursultan Nazarbaevtyń bastamasymen qolǵa alynǵan «Rýhanı jańǵyrý« baǵdarlamasynyń iske asyrylyp jatqanyna bıyl 3 jyl bolady. Úsh jyl ishinde kóp jumys atqaryldy. Sondaı-aq, Memleket basshysy Qasym-Jomart Toqaevtyń taıaýda ǵana jaryq kórgen «Abaı jáne HHІ ǵasyrdaǵy Qazaqstan« maqalasyndaǵy uly oıshyldyń eńbekteri arqyly taratqan rýhanı baǵyttaǵy tapsyrmalary bizdiń baǵdarlamamen sabaqtastyq taýyp, ózara jalǵasýda», - deıdi QR Prezıdenti Ákimshiligi Іshki saıasat bóliminiń sektor meńgerýshisi Abzal Muhımov.

Onyń aıtýynsha, «Rýhanı jańǵyrý» ultty uıystyratyn biregeı baǵdarlama.

«Qazirgi tańda baǵdarlama aıasynda 6 baǵyt boıynsha 13 arnaıy joba iske asyrylýda. Jobalardyń basym kópshiligi óte nátıjeli júrýde. Qazaqstandyq bıznes ókilderiniń baǵdarlamaǵa qatysý deńgeıi jyldan-jylǵa artyp keledi. Ásirese, metsenattardyń turmysy tómen otbasylarǵa járdemdesýi, týǵan jerlerine qaraılasýy sııaqty jumystar kásipkerlerdiń áleýmettik jaýapkershiliginiń artqandyǵynyń belgisi», - deıdi ol.

Sondaı-aq, A.Muhımov búgingi Ulttyq komıssııa otyrysynda QR Memlekettik hatshysy Qyrym Kósherbaev baǵdarlamany jańa deńgeıge kóterý jáne mazmuny men sapasyn arttyrý jóninde jańa mindetter qoıǵanyn atap ótti.

«Elbasynyń «Rýhanı jańǵyrý: bolashaqqa baǵdar« baǵdarlamalyq maqalasynda ulttyq pragmatızm máselesi óte ótkir ári jan-jaqty atap kórsetiledi. Bul baǵyttaǵy jumystarǵa tereń qaraý kerek ekendigine búgin kózimiz jetip otyr. Búgingi Ulttyq komıssııa otyrysyna qatysqan zııaly qaýym ókilderi bul bastamany qoldap, pragmatızm baǵytyndaǵy keshendi sharalar qabyldaýdy usyndy. Naqtyraq aıtsaq, Úkimetke jáne jergilikti atqarý organdaryna dańǵazalyqtan, ysyrapshylyqtan arylý, quqyqtyq, qarjylyq, ekologııalyq jáne basqa da mádenıetterdi barynsha nasıhattaý jáne taratý týraly naqty tapsyrmalar berildi», - deıdi Abzal Muhımov.