Kásipkerlerdi tekserýdiń naqty reglamenti joq – «Atameken» UKP

NUR-SULTAN. QazAqparat – Kásipkerlik nysandardy tekserýdiń naqty reglamenti joq. Osynyń saldarynan sybaılas jemqorlyq táýekeli artqan. Bul týraly Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńeste aıtyldy, dep habarlaıdy QazAqparat tilshisi.

Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńes tóraǵasy Qaıyrbek Súleımenov veterınarlyq baqylaý jáne qadaǵalaý komıteti aýyl sharýashylyq kásiporyndaryn shekten tys jıi tekseretinin aıtty.

«2016 jyldan beri QR Agroónerkásip keshenindegi memlekettik ınspektsııa komıteti júrgizetin tekserýler sany 6 ese ósken. Al Veterınarlyq baqylaý jáne qadaǵalaý komıtetiniń tekserýleri 4 ese jıilegen. Al osy tekserýlerdi júrgizý tártibi zańnamalyq aktilermen rettelmegen. Tekserýlerdiń naqty reglamenti bolmaýy sybaılas jemqorlyq táýekelderin týyndatatyny belgili», - dedi keńes tóraǵasy.
QR Ulttyq ekonomıka mınıstrliginiń kásipkrlikti damytý jónindegi saraptamalyq tobynyń teń tóraıymy Gúlnar Qurmanbaevanyń aıtýynsha, alkogol saýdasy men kóshi-qon salasy da tekserýler men aıyppuldardan kóz ashpaı ketken.
«Polıtsııa ókilderi kámelet jasyna tolmaǵan balalardy jedel áreketterge tartady. Sol arqyly jedel izdestirý zańnamasyn buzady. Balalardy zańbuzýshylyq anyqtaýǵa nemese zańsyzdyq týyndatýǵa paıdalaný kóp tirkeledi. Al kóshi-qon salasynda polıtsııa ókilderi 2018 jyly 530 tekserý júrgizgen. Sonyń saldarynan kásipkerlik nysandar 1,6 mlrd teńgeden astam aıyppul tóleýge májbúr bolǵan. Onyń bir bóligi negizsiz salynǵan dep esepteımiz. Bıyldyń ózinde kóshi-qon salasynda ishki ister salasynyń 20 qyzmetkeri sybaılas jemqorlyq boıynsha jaýapqa tartylyp otyr», - dedi Gúlnar Qurmanbaeva.