Kásipkerler turaqtandyrý qorynan azyq-túlikti qymbatqa satyp alýǵa májbúr bolǵan

PETROPAVL. QazAqparat – Soltústik Qazaqstan oblysy Sybaılas jemqorlyqqa qarsy qyzmetke jeke kásipker aryzdanyp, turaqtandyrý qoryndaǵy azyq-túlikti qymbat baǵaǵa alýǵa májbúr bolǵanyn aıtty, dep habarlaıdy QazAqparat tilshisi.

SQO Sybaılas jemqorlyqqa qarsy qyzmettiń málimetinshe, shaǵymdanýshy «Soltústik» áleýmettik-kásipkerlik korporatsııasy» AQ tarapynan ákimshilik kederginiń jasalǵanyn habarlaǵan.

Kásipkerdiń aıtýynsha, ol aýyldyq jerde dúken ustaıdy. Satý úshin turaqtandyrý qorynan áleýmettik mańyzy bar azyq-túliktiń 5 túrin almaq bolady. Alaıda aktsıonerlik qoǵamda ony áleýmettik qantty qosymsha alýǵa mindettegen. Bul taýar ol jerde basqa kóterme baǵamen satýshylardan 30 teńgege qymbat bolǵan.

«Soltústik» ÁKK» AQ osylaısha shaǵyn bıznes sýbektileri esebinen buryn qymbat baǵaǵa alynǵan azyq-túlikten qutylmaq bolǵan.

Vedomstvonyń aralasýynan keıin barlyq taraptardyń qatysýymen kezdesý ótip, másele oń sheshildi. ıAǵnı, kásipkerler qajetti azyq-túlikti esh shekteýsiz satyp ala alady», - delingen habarlamada.

Buǵan deıin SQO Sybaılas jemqorlyqqa qarsy qyzmet birneshe ret para alǵan memlekettik aýdıtordyń 7 jylǵa bas bostandyǵynan aıyrylǵanyn jarııalaǵan bolatyn. Tekserý komıssııasynyń múshesi anyqtalǵan olqylyqtarǵa kóz jumǵany úshin 300 lıtr benzın alǵan.