Kásipkerler tekserýlerdiń zańdylyǵyn «Qamqor» qosymshasymen anyqtaı alady

NUR-SULTAN. QazAqparat – QR Bas prokýratýrasy kásipkerler úshin memlekettik organdardyń tarapynan tekserýlerdiń zańdylyǵyn qalaı anyqtaýǵa bolatyndyǵyn túsindirdi, dep habarlaıdy QazAqparat tilshisi.

QR Bas prokýrorynyń orynbasary Marat Ahmetjanovtyń aıtýynsha, «Tekserýler sýbektileri men obektileriniń biryńǵaı tizilimi» júıesi qadaǵalaý jedeldigi men bıznesti zańsyz tekserýlerden qorǵaý úshin memlekettik baqylaý jáne qadaǵalaýdyń ashyqtyǵyn qamtamasyz etedi. Baǵdarlama bıznesti baqylaýshylar tarapynan negizsiz qysymnan qorǵaýdyń negizgi quraýyshtarynyń biri bolyp sanalady.

2020 jyly osy júıeniń kómegimen prokýrorlar memlekettik organdar zańsyz taǵaıyndaǵan 403 tekserýdiń jolyn kesti. Júıe aıasynda «Qamqor» mobıldi qosymshasy iske qosylǵan. Endi kásipkerler aldaǵy tekserýler týraly habarlamalar ala alady. Tekserýshi óz ókilettiginen tys shyqqan jaǵdaıda prokýratýraǵa shaǵym bere alady.

Búgingi tańda qosymshany 110 myńǵa jýyq kásipker paıdalanady.