Kásipkerler tabysyn óz bıznesine qaıta salýǵa qulyqsyz - Memleket basshysy

ASTANA. QazAqparat - Memleket basshysy kásipkerlermen kezdesýde ınvestıtsııa tapshylyǵy sebepterine toqtaldy, dep habarlaıdy QazAqparat Aqordaǵa silteme jasap.

«Ulttyq ekonomıkanyń ósimin ınvestıtsııanyń tapshylyǵy shektep otyr. Negizgi kapıtalǵa salynǵan qarjy statıstıkasyn eldiń erteńine senýdiń basty kórsetkishi retinde qarastyrýǵa bolady. Alaıda sońǵy 10 jylda kompanııanyń taza tabysy men negizgi kapıtalǵa salynǵan ınvestıtsııanyń araqatynasy 38 paıyzdan 29 paıyzǵa deıin kemidi. Basqasha aıtqanda, kásipkerler tabysyn óz bıznesine qaıta ınvestıtsııalaýǵa qulyqsyzdyq tanytyp otyr. Sonyń saldarynan jańa óndiristik qýat, jańa jumys oryndaryn ashý jáne bıýdjetke túsetin tólemderi ǵana azaımaıdy. Biz pozıtsııamyzdan aıyrylyp jatyrmyz. Negizgi qorlar fızıkalyq jáne tehnologııalyq turǵydan eskirip, jańarmaı otyr. Bul jalpy problemaǵa ınvestıtsııalyq aǵyndy ártaraptandyrýdyń báseńdeýi de áser etedi. Bizdegi sheteldik salymnyń basym bóligi (68%) burynǵydaı shıkizat sektoryna tıesili. Kerisinshe qaıta óńdeý ónerkásibi, elektr qýatyn óndirý, kólik jáne basqa da salalardan sheteldik ınvestorlardyń ketýi baıqalady. Jýyrdaǵy Joldaýymda korporatıvtik nesıelendirýdi qoldaýǵa baǵyttalǵan sheshimder aıqyndaldy. Eń aldymen, ınvestorlardy salyqtan jáne basqa da tólem mindettemelerinen úsh jylǵa bosatý mindeti tur. Úkimet bıznes-qoǵamdastyqpen birlesip, ekonomıkanyń basym sektorlaryna ınvestıtsııa tartýǵa yqpal etetin qosymsha úsh-tórt naqty sharany pysyqtaýy kerek», - dep atap ótti Qasym-Jomart Toqaev.