Kásipkerler palatasy memlekettiń tolyqqandy áriptesine aınaldy - Prezıdent
Memleket basshysynyń quttyqtaýyn sezde Premer-Mınıstrdiń orynbasary Erulan Jamaýbaev oqyp berdi.
«Qurmetti sezge qatysýshylar, «Atameken» Ulttyq kásipkerler palatasynyń H seziniń ashylýymen quttyqtaımyn. Otandyq bıznes elimizdiń ekonomıkasyn órkendetýge aıryqsha yqpal etedi. Biz naryqtyq ekonomıka quryp jatyrmyz. Sol sebepti, ónerkásip salasynda, ekonomıkada ózgerister jasaý jáne elimizdi damytý jolynda jaýapty ári myqty kásipkerler qaýymy basty ról atqarady. Qazaqstanda shaǵyn jáne orta bıznesti órkendetýge basa mán beriledi», - delingen Prezıdenttiń quttyqtaýynda.
Prezıdent keıingi 10 jylda osy salanyń jalpy ishki ónimdegi úlesi 2 ese ósip, 34 protsentke jetkenin atap ótedi. Búginde bızneste 3,5 mln astam adam eńbek etip júr. Sondaı-aq, Memleket basshysy Ulttyq palatanyń aldynda naryqqa sapaly saraptama jasaý úderisine qatysý úshin jańa tásilder ázirleý mindeti turǵanyn aıtady.
«Osy ýaqyt ishinde UKP memlekettiń tolyqqandy áriptesine aınaldy. «Atamekenniń» mıkro jáne shaǵyn bıznesti qoldaýdaǵy, óńirdegi kásipkerlikti damytýda basymdyq bere otyryp, jasap jatqan aýqymdy ózgeristeri elimizdiń aldynda turǵan maqsat-mindetterge tolyq saı keledi. Sizderdiń aldaryńyzda memlekettik jáne salalyq baǵdarlamalar qabyldap, júzege asyrý, naryqqa sapaly saraptama jasaý úderisine qatysý úshin jańa tásilder ázirleý mindeti tur», - deıdi Qasym-Jomart Toqaev.
Prezıdenttiń aıtýynsha, «kásipkerler palatasy otandyq bıznestiń básekelik qabiletin arttyrýǵa, qyzmetin jaýapkershilikpen atqarýǵa yntalandyrýǵa jáne jumys oryndaryn ashýǵa atsalysa otyryp, bılik pen isker azamattardy baılanystyratyn tıimdi arnaǵa aınalýy tıis. «Atameken» taýar ótkizý naryǵyn keńeıtýge ruqsat berý rásimderin jeńildetýge, memlekettik satyp alý jumysynyń qoljetimdi bolýyna jáne sybaılas jemqorlyq qaperin azaıtýǵa barynsha septigin tıgizýi kerek».
Sonymen qatar, Qasym-Jomart Toqaev palata otandyq kásipkerlerliktiń betke ustar ókilderi men shaǵyn jáne orta bıznes sýbektileri arasynda ózara tıimdi yqpaldastyq ornatyp, úılesimdi jumys isteýin qamtamasyz etý jolynda mańyzdy ról atqaratynyn málimdedi. Mıkro jáne shaǵyn bıznes ókilderin tekserýge jarııalanǵan maratorıı taǵy bir jylǵa uzartylǵanyn da atap ótti.
«Memleket shaǵyn jáne orta bıznestiń damýyna barynsha jaǵdaı jasap, kez kelgen zańdy kásipkerlik qyzmetke qoldaý kórsetedi, ony qorǵaıdy. Elimizde adal báseke, áleýmettik jaýapkershilik, jasampaz eńbek qundylyqtaryn basshylyqqa alatyn kásipkerlerdiń jańa qaýymy qalyptasýy óte mańyzdy. Qazaqstanda bıznesti óńirlik qana emes, jahandyq deńgeıde órkendetýge mol múmkindik bar. Memleket palatamen birlesip, ulttyq ekonomıkany monopolııadan aryltý, naryqtardy ıgerý, barlyǵyna túsinikti ádil oıyn erejesin qalyptastyrý úshin júıeli jumysty jalǵastyrady», - delingen quttyqtaýda.
Prezıdent kásipkerlerdi quttyqtaýyn qoryta kele, «memleket pen bıznestiń birlesip jumys isteýi elimizdi áleýmettik-ekonomıkalyq turǵydan damytýǵa jáne halyqtyń ál-aýqatyn arttyrýǵa jol ashady» dep senim bildirdi.
Foto:atameken.kz