Kásipkerler nemeresi ótinish jasaǵan soǵys ardagerine múgedekter arbasyn syılady

AQTÓBE. QazAqparat - Elimizdiń Ulttyq Kásipkerler palatasynyń bastamasymen uıymdastyrylǵan «Urpaqtar alǵysy» respýblıkalyq aktsııasynyń aıasynda «Altyn Qyran» halyqaralyq qaıyrymdylyq qory soǵys ardageri Muhambetqalı Baımuratovqa múgedekter arbasyn syıǵa tartty.

1943 jyldyń aqpanynda 18 jasynda ol maıdanǵa shaqyryldy. General Tolbýhın basqarǵan 3-shi Ýkraına maıdanynyń quramynda jaıaý áskeri qatarynda soǵysqan. Qatardaǵy jaýynger Baımuratov Ýkraına, Rýmynııa, Vengrııany azat etýge qatysqan. 1945 jyldyń naýryz aıynda Vengrııanyń Mor qalasynyń mańynda jaraqat aldy: sol jaq qolyna tıgen oq onyń sińiri men júıke tamyrlaryna zııan keltirdi. Soǵystyń aıaqtalýy týraly qýanyshty habardy gospıtalda jatqan kezde estigen. Úıine 1945 jyldyń jazynda oraldy.

Beıbit ómirde Muhambetqalı Baımuratov 46 jyl boıy balalardy oqytqan. Alǵashynda týǵan aýyly - Týrajolda mektepte tarıh muǵalimi, odan keıin kórshiles Petropavlovkada eńbek etken. Oǵan Qazaq KSR "Halyq aǵartý isiniń úzdigi" ataǵy berilgen.

QR UKP-ǵa soǵys ardageriniń nemeresi Tımýr súıikti atasy úshin múgedekter arbasyn satyp alýǵa kómek suraı keldi. «Altyn Qyran" halyqaralyq qaıyrymdylyq qorynyń prezıdenti maıdangerge kómekke asyqty. Keshe ardager óz syılyǵyn aldy. Endi Muhambetqalı ata 9 mamyrda oblys ortalyǵynda ótetin merekelik sharalardyń kýágeri bola alady.