Kásipkerler mektep ashanasyndaǵy tamaq qunyn kóterýdi usyndy
Kásipkerler birinshi kezekte kúnine bir oqýshyǵa shaqtalǵan bir rettik tamaqtaný qunyn kóterýdi suraıdy. Búginde baǵa 2020 jylǵy qańtar deńgeıinde qalyp, QQS-ty esepteýmen 376 teńgeni quraıdy.
«Tamaqtaný qunyn 600 teńgege deıin ósirýdi nemese ózindik qun boıynsha mázirdi qysqartý máselesin qarastyrýdy suraımyz. Óıtkeni 2021 jyly 6-7% ınflıatsııalyq ústemeniń bolmaýy jáne tamaq ónimderi qunynyń 43%-ǵa deıin qymbattaýy, sondaı-aq tamaq jetkizýshilerge baıqaý qujattamasynyń tehnıkalyq tapsyrmasyna qarastyrylmaǵan sanıtarııalyq sharalar – qorǵaný maskalary, sanıtaızerler, termometrler jáne basqa sharalardy saqtaýǵa baılanysty salynǵan qosymsha shyǵyndar saldarynan jumys isteý tıimsiz», – dedi Nur-Sultan qalasy kásipkerler palatasynyń dırektory Almat Júnisov.
Jalǵa alýshylardyń aıtýynsha, elordada bilim berý basqarmasy bastaýysh (1-4 synyp) synyp oqýshylaryna jyl saıyn tegin tamaqtandyrýdy uıymdastyrady. Osy qyzmetti atqarýǵa qala bıýdjeti esebinen tıisti qarjy qarastyrylǵan.
Sonymen qatar kásipkerler karantın sharalaryn saqtaý sheńberinde ashanalar 2020 jyldyń naýryzynan bastap jumys istemedi, endi jumys uıymdastyrý úshin olarǵa jaqyn arada 1500 jumysshy kerek.
«Pandemııa kezeńinde bilikti personaldyń basym bóligi qyzmetten bosady nemese qysqartyldy. Jumys oryndaryna 1500 jumysshy kerek. Budan bólek, qyzmetti 1,5 jyl májbúrli toqtatýdan keıin ashana bloktarynda jóndeý jumystary, deratızatsııalyq, dezınfektsııalyq, dezınsektsııalyq jumystaryn júrgizip, jeldetý júıesin tazalap, ashana bólmelerin jýyp-shaıý qajet», – deıdi jalǵa alýshylar.
Sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalardy saqtaý úshin dezınfektsııalyq quraldar, qorǵaný maskalary, sanıtaızerlerdi ornatyp, sondaı-aq azyq-túlik ónimderin ózin satyp alýǵa qosymsha qarjylandyrý qajet.
«Osy jumystarǵa aldyn ala daıyndala almadyq, óıtkeni jumys isteýge ruqsat beretinin-bermeıtinin bilmedik. Al qyzmet kórsetýge daıyndyq qarjy salýdy talap etedi, sondyqtan qaýlynyń shyǵýyn kúttik. Bizge balalar densaýlyǵynyń qaýipsizdigin qamtamasyz etý úshin barlyq sanıtarııalyq normatıvti qatań saqtaý kerek», – dep atap ótti tamaqtaný salasy ókilderiniń atynan «Sootechestvennıkı» JShS dırektory Anastasııa Zaharenkova.
Sanıtarııalyq normalarǵa keler bolsaq, jetkizýshiler tamaqtaný zalynda aýa retsırkýlıatorynyń bolýyna mektep álde jetkizýshi jaýapty ekenin túsindirýdi surady, óıtkeni tamaqtaný zaly tamaq jetkizýshiniń jalǵa alǵan aýdanyna kirmeıdi.
Sondaı-aq, jalǵa alýshylar pandemııa kezinde jumysty toqtata turýǵa májbúr bolǵandyqtan, jalǵa alý kúnin naqty jumys bastalǵan kúnnen esepteýdi suraıdy. Kelisimshartqa sáıkes, úsh jyl jumys merzimin uzartýdy esepke alǵanda, búginde jumys isteýge taǵy 1,5 jyl qaldy.