Kásipkerler Qurylysty qoldaý qoryn qurýdy usyndy

ASTANA. QazAqparat - Qurylysty qoldaý qoryn qurý kerek. Bul týraly Astana qalasy Kásipkerler palatasynyń dırektory Beısen Jolboldıev aıtty, dep habarlaıdy QazAqparat tilshisi.

Onyń aıtýynsha, qazirgi kezde ıpotekalyq nesıe bólý baǵdarlamalary jetkiliksiz bolyp tur.

«Salynǵan nysandardyń basym bóligi ıpotekalyq nesıe bólý esebinen ótkizilip jatyr. Bul turǵyda bólingen lımıtterdiń ıgerilýine oraı, halyqtyń qaltasy kóteretin baǵdarlamalar naryqtan ketip jatyr. «7-20-25» baǵdarlamasynyń da ýaqyty jaqyndap keledi. Otbasy banki arqyly baspana alýǵa bolady, alaıda 50 paıyz somasyndaǵy bastapqy jarnany kóbisi eńsere almaıdy», - dedi B. Jolboldıev qaladaǵy bıznes ókilderiniń Senat depýtattarymen kezdesýi kezinde.

Astana qalasy Kásipkerler palatasynyń málimetinshe, 2021 jylǵy qańtar-tamyzben salystyrǵanda qala boıynsha satylym 6,2 paıyzǵa azaıǵan.

B. Jolboldıev Qurylysty damytý qoryn qurý bastamasyna qoldaý bildirýdi surady. Qor baspana turǵyzýda qurylys salýshylarǵa, QR rezıdentterine nesıe bóletin bolady.

Sonymen qatar, qaladaǵy qurylys ındýstrııasyn qoldaý boıynsha óńirlik baǵdarlamany ázirleý usynyldy.