Kásipkerler KO aıasynda elge ákelgen taýarlarǵa salyqty 50 kúnniń ishinde tóleýi tıis - Á.Jumadildaev

ASTANA. QazAqparat - Kásipkerler Keden odaǵy aıasynda elge ákelgen taýarlaryna tólenetin salyqty 50 kúnniń ishinde tólep, esep-qısabyn ótkizýi tıis. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Qarjy mınıstrligi Salyq komıtetiniń tóraǵasy Ánýar Jumadildaev málim etti.

«Taýar elge kirgennen keıin sol ýaqyttan bastap kelesi aıdyń 20-syna deıin óziniń janama jáne qosymsha salyqtardy tóleý úshin esep-qısabyn tapsyrýy kerek. Eger kásipker taýaryn aıdyń 1-shi kúni kirgizse, kelesi aıdyń 20-syna deıin 50 kún ýaqyty bolady. Bul Keden odaǵynyń eń ońtaıly tusy deýge tolyq negiz bar», - dedi ol.

Onyń atap ótýinshe, buǵan deıin kásipkerlerge elge taýaryn kirgizý úshin joǵaryda atalǵan salyqtardyń barlyǵyn aldyn ala tóleýi qajet edi.

«Al endigi ýaqytta olar salyqtaryn tólemesten ákelgen taýarlaryn birden naryqqa shyǵarýylaryna jol ashylyp otyr»,- dedi Á.Jumadildaev.