Kásipkerler Astana sý arnasynyń ústinen shaǵymdanýda

ASTANA. QazAqparat - Búgin Astana qalalyq kásipkerler palatasynda bıznesmenderdiń quqyqtaryn qorǵaý keńesiniń kezekti otyrysy ótti. Osy joly jergilikti monopolısterdiń kásipkerlerge shamadan tys aıyppuldardy salý máselesi qaraldy, dep xabarlaıdy QazAqparat tilshisi.

Palata sarapshysy Nurjan Býkınniń aıtýynsha, búginde sý men elektrenergııa salasyndaǵy monopolıster eski erejelerdi paıdalanyp, eseptegish quraldaryna plomba salmaǵany jáne sol plombany alyp tastaǵany úshin tym aýyr aıyppuldar salady. «Máselen, «Astana sý arnasy» mekemesi «Marden» bıznes ortalyǵyna qyzmet kórsetip júrgen kompanııaǵa sýdy 37 kún plombasyz paıdalanǵany úshin 28,4 mıllıon teńge kóleminde aıyppul salǵan. Sonda plombany kimniń buzǵany belgisiz. Astana sý arnasy ony da durys rásimdemepti. Kompanııanyń ózi úshin plombany buzǵan tıimsiz. Sebebi olar aı saıyn 200 myń teńgedeı aqy tólep turdy. Al osy jolǵy aıyppul 12 jyldyń tólemaqysymen birdeı. Osylaısha, monopolıstiń qazirgi aıyppuldary shyǵynnyń naqty somasynan on ese, tipti júz ese artyq bolyp jatady», - deıdi Býkın.

Osyǵan baılanysty kásipkerler tıisti erejelerge ózgeris engizip, aıyppuldyń mólsherin qubyrdyń ótkizý kólemine qaraı emes, sýdy naqty tutyný kólemine qaraı esepteýdi usynyp otyr. Áıtpese, búginde plomba buzylsa, kásipkerler sýdy únemi aǵyzyp qoıǵandaı aıyppul tóleýge májbúr bolady.

«Men sýǵa aı saıyn 160-200 myń teńge tóleımin. Endi, 28 mıllıon teńge aıyppul jazyp berip otyr. Biz barlyq krandardy ashyp, sýdy aǵyzyp qoısaq ta, ondaı aqsha shyqpaıdy. Sosyn plombany buzǵan kimge tıimdi? Mysaly, maǵan tıimsiz. Men úshin aıyna 200 myń teńge tólep otyrǵan durys emes pe? Biz aı saıyn bankke 17 mıllıon teńge tóleımiz. Al onyń ústine 28 mıllıon teńge aıyppul salǵan ońaı deısiz be?», - deıdi «Marden» bıznes ortalyǵyna qyzmet kórsetýshi kompanııanyń dırektory Juldyz Kákenov.

Palata múshesi Qanat Eleýsinovtyń aıtýynsha, plombany santexnıkterdiń ózderi buzyp, artynan kásipkerlerdi bopsalaıdy. «Iá, ondaı jaǵdaılar da bar. Santexnıkpen birge júrmeseń, ol ózi baryp, plombany buzyp tastaıdy da, artynan aqsha bopsalaıdy. Sondyqtan plombalar turǵan jerde beınebaqylaý júıesi ornatylýy qajet», - deıdi Eleýsinov.

Degenmen, qazirgi erejelerdi ózgertpese, monopolıster kásipkerlerge shamadan tys aıyppuldardy salyp, qınaı beredi. Óıtkeni sottar da ol erejelerdi negizge ala otyryp shyǵarady.

Aıta keteıik, Astana sý arnasynyń ókilderi búgingi otyrysqa kelgen joq.