Kásipker Semeıdiń 10 jyldan beri «saqaldy» qurylysqa aınalǵan meshitin salyp bermek
Kezinde Ortalyq Azııanyń biregeı meshitteriniń birine aınalady dep jarııa etilgen nysannyń qurylys jumystary 2008 jyldyń 1 mamyrynda bastalǵan bolatyn. Qurylysqa qalanyń ortalyǵynan, Ertis ózeniniń ústinen salynǵan aspaly kópirdiń janyndaǵy aınalmaly joldyń qaq ortasynan aýmaǵy 3 gektardy quraıtyn jer telimi bólindi. Osy on jyldyń ishinde nysan qurylysynyń merdigerleri talaı aýysyp, meshittiń jobasyna da ózgerister engizilip otyrdy. Alaıda biraq qarjynyń jetispeýshiliginen qurylys birneshe ret toqtap, ǵımarat aıaqsyz qaldy. Bir kezderi túrik demeýshileri de meshit qurylysyn almaq bolyp, arab ınvestorlary da qyzyǵýshylyq tanytqanymen naqty iske barǵan emes. Qazaqstandyq kásipkerlerdiń de talpynysy nátıjesiz boldy. Tipti arnaıy «Semeı» órleý» qaıyrymdylyq qory qurylyp, meshit qurylysyna qarajat jınaýmen aınalysqan bolatyn. Degenmen jan-jaqtan jınalǵan 200 mln teńge tek ǵımarat pen onyń tórt munarasynyń irgetasyn qalap, qajetti kommýnıkatsııa júıesin tartýǵa ǵana jetken edi.
Endi mine jobaǵa jańa ınvestorlar tartylyp, qazaqstandyq «TAS Group» kompanııalar toby meshit qurylysyn qolǵa almaq. Qarajatty «TASKREDIT» qarjy kompanııasy bólip, «AHTAS Construction» qurylys kompanııasy bas merdiger bolyp belgilengen.
«TAS Group» kompanııalar tobynyń jetekshisi Dýlat Tastekeevtiń aıtýynsha, meshit qurylysyna 500 mln teńge bólinip otyr. Qurylys jumystary eki jyldyń ishinde aıaqtalyp, nysan qala halqynyń ıgiligine tabystalmaq.
«Atamyz Keńes zamanynda «Aqsýat pen Ekpinde eki meshit salaıyq», dep hat jazamyn dep biraz qýdalaýǵa ushyraǵan eken. Keıin, 2009 jyly ákem týǵan aýylymyz Ekpinde meshit salyp halyqtyń qoshemetine bólendi. Osydan 5-6 jyl buryn «ákem aýylda meshit saldy, endi bizdiń qolymyzdan Allanyń úıin aýdan ortalyǵynda, keıingi urpaq oblystyq deńgeıinde salsa ǵoı» degen arman boldy. Sol arman jetegimen 2015 jyly Aqsýat aýdanyndaǵy meshittiń qurylysyn bastap, 2016 jyly bitirdik. Endi Semeı qalasyndaǵy meshitti salmaqpyz. Semeıdiń oblystyq mártebesin aıyrylǵannan keıingi múshkil halin kórip janym aýyratyn. Al kópir tusyndaǵy «saqaldy» qurylys bolyp qalǵan meshit júrekti jaralaıtyn. Endi mine sáti kelip, qurylys jumystaryn bastamaqpyz. Alla qalasa, qurylysyn 1-2 jyldyń ishinde aıaqtap, týǵan qalamyz Semeıge ádemi meshitti syıǵa tartatyn bolamyz. Meshit qurylysyn jalǵastyrý týraly qala ákimshiligimen de aqyldastyq, olar barlyq jaǵynan qoldaý kórsetemiz dep otyr», - dedi Dýlat Tastekeev.
Aıta keterligi, Semeı meshitiniń jobasyna ózgerister de engizildi. Bul jobany qolǵa alyp otyrǵan qurylys kompanııasy jergilikti tabıǵat jaǵdaılaryn eskermegen sándi ári saltanatty, biraq qolaısyz eskızden bas tartty. Bastapqy jospardaǵydaı qalalyq meshittiń ǵımaratynda qatymhana bolady. Jobalaýshylar ortalyq meshittiń janynan kólemdi avtoturaqty da eskergen. Meshitke bir mezgilde 2500 adam syıyp ketedi, avtoturaq 500 kólikke arnalǵan.
2018 jyldyń 19 maýsymynda Semeı qalasynyń ákimi Ermak Sálimovtiń, Shyǵys Qazaqstan oblysynyń, qalanyń bas ımamdarynyń qatysýymen qurylys jumystarynyń bastalýyna oraı resmı shara ótkizilmek. Qurylystyń basynda qurban shalynyp, quran oqylyp, as beriledi.