Kásipker Orıfjan Shadıevke qatysty sot úkimi shyqty
Tergeý málimetterine sáıkes, 2019 jyldyń 22 sáýirinde Orıfjan Shadıev Asia Credit Bank-tiń ıesimen bank aktsııalaryn satyp alý týraly kelisim jasasqan. Alaıda, ol úshin 5 kompanııanyń nesıesin óteýi qajet bolǵan. Shadıev qaryzdyq mindettemelerdi (16,7 mlrd teńge) óz moınyna alýǵa kelisip, aktsııalardy satyp alǵan.
Alaıda, Orıfjan Shadıev kómekshisi Mıhaıl Solovevpen birge bankti jańylystyrý arqyly jalǵan qujattardy qoldanyp, kepilzattyń (jer ýchaskesiniń) naryqtyq qunyn asyra baǵalaǵan. Jalpy kepil quny 25 mlrd teńge bolatyn 7 jer telimi túrindegi ótimdi kepildi naryqtyq quny 46 mlrd teńgeden asatyn jer ýchaskesine aýystyryp jibergen.
«Qylmystyq josparǵa sáıkes, Shadıev pen Solovev joǵaryda atalǵan jeti jer ýchaskesin bank kepilinen alyp tastaý týraly sheshim qabyldap, ótimdi aktıvterdiń ornyna ótimdiligi tómen, banktiń nesıelik jáne kepil saıasatynyń talaptaryna sáıkes kelmeıtin No2063A jer telimine aýystyrǵan», - dep atap ótti sottan.
Asia Credit Bank lıtsenzııasynan aıyrylǵannan keıin taratý komıssııasy bul zań buzýshylyqty anyqtady.
Sot Orıfjan Shadıevti banktiń qıyn qarjylyq jaǵdaıyn bile tura jalǵan qujattar arqyly kepilzattyń naryqtyq qunyn negizsiz ósirgen dep sheshti.
Osylaısha, kásipker men onyń kómekshisi banktiń taratý komıssııasyna 16,7 mlrd teńge múliktik zalal keltirgen.
Orıfjan Shadıev pen Mıhaıl Solovev kinásin jartylaı moıyndady. Kásipker QR Qylmystyq kodeksiniń 250-babynyń 2-bóligimen («Qarjy uıymynyń, banktik jáne (nemese) saqtandyrý holdınginiń basshy qyzmetkeriniń ókilettigin asyra paıdalanýy») kináli dep tanylyp, 1 jyl 6 aıǵa, kómekshisi 1 jylǵa bas bostandyǵynan aıyryldy.
Sondaı-aq, sot olardy bankke keltirilgen shyǵyndy óteýge mindettedi.
Úkim zańdy kúshine engen joq.
Eske salaıyq, 2021 jyly «AsiaCredit Bank» AQ baǵaly qaǵazdar naryǵynda qyzmetti júrgizý lıtsenzııasynan aıyrylǵan bolatyn.
Keıin QR Qarjylyq monıtorıng agenttigi AsiaCredit Bank múlkin urlaýǵa qatysty fakt tergelip jatqanyn málimdegen edi.