Kásipker Orıfdjan Shadıevtiń jazasy jeńildetildi

ALMATY. QazAqparat - Apellıatsııalyq sot burynǵy bankır Orıfjan Shadıev pen onyń kómekshisi Mıhaıl Solovevke qatysty úkimin ózgertti. Bul týraly Almaty qalalyq sotynyń baspasóz qyzmeti málim etti, dep habarlaıdy QazAqparat tilshisi.

«11 tamyzda apellıatsııalyq sot Asia Credit Bank-ke zalal keltirý isi boıynsha birinshi ınstantsııanyń sheshimine ózgerister engizdi. Shadıevti eki jylǵa bas bostandyǵynan shekteý, Solovevke bir jyl alty aıǵa bas bostandyǵyn shekteý jazasy taǵaıyndaldy. Olardyń árqaısysyna qarjy uıymynyń, banktik jáne saqtandyrý holdınginiń basshy qyzmetkeri laýazymdaryn atqarýǵa jáne qarjy uıymynyń iri qatysýshysy bolýǵa tyıym salý túrindegi qosymsha jaza taǵaıyndaldy», - dep habarlaıdy Almaty qalalyq sotynyń baspasóz qyzmetinen.

Buǵan deıin, Almatynyń Almaly aýdandyq soty kásipker Orıfjan Shadıevti Asia Credit Bank-ke 16,7 mıllıard teńge shyǵyn keltirgeni úshin 1 jarym jylǵa bas bostandyǵynan aıyrǵan. Al, kómekshisin 1 jylǵa sottaǵan bolatyn.

Tergeý málimetterine sáıkes, 2019 jyldyń 22 sáýirinde Orıfjan Shadıev Asia Credit Bank-tiń ıesimen bank aktsııalaryn satyp alý týraly kelisim jasasqan. Alaıda, ol úshin 5 kompanııanyń nesıesin óteýi qajet bolǵan. Shadıev qaryzdyq mindettemelerdi (16,7 mlrd teńge) óz moınyna alýǵa kelisip, aktsııalardy satyp alǵan.

Alaıda, Orıfjan Shadıev kómekshisi Mıhaıl Solovevpen birge bankti jańylystyrý arqyly jalǵan qujattardy qoldanyp, kepilzattyń (jer ýchaskesiniń) naryqtyq qunyn asyra baǵalaǵan. Jalpy kepil quny 25 mlrd teńge bolatyn 7 jer telimi túrindegi ótimdi kepildi naryqtyq quny 46 mlrd teńgeden asatyn jer ýchaskesine aýystyryp jibergen.

Qylmystyq josparǵa sáıkes, Shadıev pen Solovev joǵaryda atalǵan jeti jer ýchaskesin bank kepilinen alyp tastaý týraly sheshim qabyldap, ótimdi aktıvterdiń ornyna ótimdiligi tómen, banktiń nesıelik jáne kepil saıasatynyń talaptaryna sáıkes kelmeıtin No2063A jer telimine aýystyrǵan.

Asia Credit Bank lıtsenzııasynan aıyrylǵannan keıin taratý komıssııasy bul zań buzýshylyqty anyqtady.

Sot Orıfjan Shadıevti banktiń qıyn qarjylyq jaǵdaıyn bile tura jalǵan qujattar arqyly kepilzattyń naryqtyq qunyn negizsiz ósirgen dep sheshti.

Osylaısha, kásipker men onyń kómekshisi banktiń taratý komıssııasyna 16,7 mlrd teńge múliktik zalal keltirgen.

Eske salaıyq, 2021 jyly «AsiaCredit Bank» AQ baǵaly qaǵazdar naryǵynda qyzmetti júrgizý lıtsenzııasynan aıyrylǵan bolatyn.

Keıin QR Qarjylyq monıtorıng agenttigi AsiaCredit Bank múlkin urlaýǵa qatysty fakt tergelip jatqanyn málimdegen edi.