Kásipker: Aýylǵa jol salý - damýǵa serpin beretin jumys

AQTÓBE. QazAqparat - Aqtóbedegi kópirler men joldar qurylysyn júrgizip otyrǵan kásipker Tólegen Tańatarov Joldaýdaǵy aýyl joldary qurylysynyń mańyzdylyǵyn atap ótti, dep habarlaıdy QazAqparat tilshisi.

Bıyl Aqtóbe oblysynda 150 shaqyrym jol jóndelip jatyr. Qala ishindegi eki kópirdi salǵan «Trans-MostGroup» qurylys uıymynyń bas dırektory Tólegen Tańatarov endi aýyl joldary jóndelse, qatynas artyp, adamdar jol azabynan arylatynyn aıtyp berdi.

«Respýblıka kóleminde joldar men kópirlerdi salýǵa, sonyń ishinde bizdiń óńirde de úlken qarajat bólinedi. Qarjylaı qoldaýdyń mol qory Memleket basshysynyń aýyldar men aýdan ortalyqtaryn oblys ortalyqtarymen baılanystyratyn sapaly joldardyń qurylysy týraly tapsyrmasyn tolyq oryndaýǵa múmkindik beredi. Bul shara aýyldyń damýyna kúmánsiz serpin beredi», - dedi «Trans-MostGroup» qurylys uıymynyń bas dırektory Tólegen Tańatarov.

Elbasy óz Joldaýynda ákimderge aýyl, aýdan arasyndaǵy qatynasty retke keltirýdi tapsyrdy. Endi qarjylandyrý kólemi artyp, jergilikti mańyzy bar joldarǵa 150 mıllıard teńgege deıin, al aýyldyq jerlerdi sýmen qamtýǵa 100 mıllıard teńgege deıin qarjy bólinedi.
Eske salsaq, bıyl Aqtóbe-Atyraý joly salynyp jatyr. Qurylys jumystary kezinde jergilikti materıaldary paıdalanylady. 

Bul Aqtóbeniń Temir, Alǵa, Muǵaljar, Baıǵanın aýdandaryna aparatyn joldy qalpyna keltirýge múmkindik beretin joba. Sonymen qatar, Aqtóbe-Orsk tasjoly salynyp jatyr. Ári aýyl ishindegi joldar qurylysy memlekettik-jekemenshik seriktestik aıasynda júrgizildi.