Kásip bastaý: jastardyń 4122 jobasyna 2,5 paıyzdyq mıkrokredıt beriletin boldy

ASTANA. QazAqparat - Jastardyń kásipkerlik bastamalaryn iske asyrý úshin beriletin jyldyq mólsherlemesi 2,5%-dyq mıkrokredıtter alýǵa 6 myńnan astam ótinim túsip, onyń ishindegi 4 122 joba maquldandy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Málimetke saı, 2023 jylǵy 1 qyrkúıektegi jaǵdaı boıynsha «Agrarlyq kredıttik korporatsııa» AQ-ǵa kásipkerlik bastamalardy iske asyrý úshin jastarǵa beriletin jyldyq mólsherlemesi 2,5%-dyq jeńildetilgen mıkrokredıtter alýǵa 6 myńnan astam ótinim tústi. Bıyl jalpy 5 796 mıkrokredıt berý josparlanǵan. Qazirdiń ózinde 4 122 joba maquldandy.
Mıkrokredıttiń mólsheri 5 mln teńgege deıin, al qatysýdyń eń uzaq merzimi – 5 jylǵa (kez kelgen maqsatqa) nemese 7 jylǵa deıin (mal sharýashylyǵy salasyndaǵy jobalar úshin). Nomınaldy syıaqy mólsherlemesi – jyldyq 2,5%-dan aspaıdy.

Mıkrokredıt alýǵa ótinimderdiń eń kóbi Túrkistan (851), Jambyl (514), Qyzylorda (434), Almaty (401), Batys Qazaqstan (393), Qaraǵandy (392) oblystarynan tústi.

Konkýrstyq komıssııalardyń sheshimimen 4122 joba maquldandy, onyń ishinde 3222 jobany iske asyrýǵa kredıt berildi. Kredıt alýshylardyń basym kópshiligi mal sharýashylyǵy, qyzmet kórsetý, saýda, ósimdik sharýashylyǵy jáne jeńil ónerkásip salasyn qamtydy.

Sondaı-aq, mıkrokredıt 21 jastan 35 jasqa deıingi jastarǵa óz kásibin ashýǵa nemese ony keńeıtýge, 5 jyldan aspaıtyn merzimmen jeke kásipker retinde tirkelgen jaǵdaıda beriledi. Bul rette qatysýshylardyń «Agrarlyq kredıttik korporatsııa» AQ-ǵa ótinimmen júgingen ýaqyttaǵy jasy eskeriledi.

Mıkrokredıt alýshylar úshin negizgi borysh pen syıaqyny óteý boıynsha jeńildikti kezeń beriledi, ol mıkrokredıt merzimi uzaqtyǵynyń úshten birinen aspaıdy.

Kepilmen qamtamasyz etýdiń bolýy mindetti shart bolyp tabylady. Aǵymdaǵy jyldyń 4-qyrkúıeginen bastap jastarǵa jyldyq 2,5% jeńildikpen mıkrokredıt berý úshin qabyldanatyn kepildi múlik túrleriniń tizbesi keńeıtilgen.

Sonymen, kepilmen qamtamasyz etý retinde qosymsha qabyldanady:

- ekinshi deńgeıdegi bankterdegi shottarda ornalastyrylǵan aqsha qarajaty;

- respýblıkalyq mańyzy bar qalalarda, oblystyq mańyzy bar qalalarda, aýdan ortalyqtarynda, oblystyq jáne aýdandyq baǵynystaǵy qalalarda, sondaı-aq aýyldarda jáne aýyldyq eldi mekenderde jyljymaıtyn múlik;

- jeke menshik quqyǵyndaǵy/bastapqy uzaq merzimdi óteýli jer paıdalaný (jalǵa alý) (egistik) quqyǵyndaǵy aýyl sharýashylyǵy maqsatyndaǵy jer ýchaskeleri;

- jaıylymdardy sýlandyrý jáne qorshaý ınfraqurylymy bar jer ýchaskeleri;

- baý-baqsha ósirýge arnalǵan jer ýchaskeleri;

- mamandandyrylǵan tehnıka.

Kepilmen qamtamasyz etý bolmaǵan jaǵdaıda kepil berýshini (ata-analaryn, týystaryn jáne t.b.) tartýǵa bolady.

Mıkrokredıtter arnaıy komıssııanyń sheshimi negizinde beriledi, onyń otyrystarynda úmitkerler ózderiniń bıznes-jobalaryn tanystyrady.

Osylaısha, mıkrokredıt berý týraly sheshim komıssııalyq jáne naqty is-qımyl josparymen ózekti, dáleldi, ekonomıkalyq negizdelgen, qoǵamdyq mańyzy bar, ómirsheń bolýy tıis jobanyń pysyqtalýyn baǵalaýdyń naqty krıterııleri negizinde qabyldanady.

Qazirgi ýaqytta mıkrokredıtter alýǵa ótinimder barlyq oblystarmen Astana, Almaty jáne Shymkent qalalarynda qabyldanýda.

«Agrarlyq nesıe korporatsııasy» AQ fılıaldarynyń mekenjaılary myna saıtta kórsetilgen: https://www.agrocredit.kz.