Qasym-Jomart Toqaev Vetnamnyń jańadan saılanǵan Prezıdentin quttyqtady

<p>ASTANA. KAZINFORM - Qasym-Jomart Toqaev To Lamǵa Vetnam Sotsıalıstik Respýblıkasynyń Prezıdenti bolyp saılanýyna oraı quttyqtaý jedelhatyn joldady, dep habarlaıdy Aqordanyń baspasóz qyzmeti.</p>

Memleket basshysy Vetnam Prezıdentiniń aldaǵy barlyq bastamasyna tabys, al dostas vetnam halqyna baq-bereke tiledi.

«Siz osy laýazymda qyzmet etken kezeńde ǵajap elińiz odan ári gúldenip, úılesimdi jáne ornyqty qoǵam qurý jolynda turaqty damı beretinine senimdimin. Qazaqstan men Vetnamdy ózara senim men ortaq múddege negizdelgen tyǵyz qarym-qatynastar baılanystyrady. Elderimizdiń múddesi jolyndaǵy kópqyrly yqpaldastyqty órkendetý úshin jańa múmkindikterdi Sizben birlesip paıdalanýǵa daıynmyn», – dep jazylǵan jedelhatta.

Osyǵan deıin Vetnamnyń Ulttyq jınalysy (bir palataly parlament) sársenbi kúni Vetnam Kommýnıstik partııasy Ortalyq Komıteti Saıası bıýrosynyń múshesi To Lamdy eldiń jańa prezıdenti etip saılanǵanyn jazǵan edik.