Qasym-Jomart Toqaev Túrki memleketterin Kaspıı jáne Aral teńizindegi ekologııalyq máseleni birigip sheshýge shaqyrdy

<p>ShÝShA. KAZINFORM&nbsp;&ndash; <strong>Prezıdent Qasym-Jomart Toqaev Túrki memleketteri uıymynyń beıresmı sammıtinde </strong>Kaspıı jáne Aral teńizderindegi ekologııalyq máselelerdi sheshý úshin birlesken kúsh-jiger qajet ekenine nazar aýdardy. Bul týraly Aqordanyń baspasóz qyzmeti habarlady.</p>

Memleket basshysy Kaspıı teńizindegi ekologııa máselesi, Aral teńiziniń qurǵap, shólge aınalýy alańdatarlyq jaǵdaı ekenin aıtty.

– Kaspıı teńiziniń logıstıkalyq áleýetin arttyrý mańyzdy dedik. Biraq ondaǵy ekologııa máselelerin de nazardan tys qaldyrmaý qajet. Mysaly, ózekti túıtkildiń biri – teńizdiń tartylýy. Onyń qorshaǵan ortasyn, florasy men faýnasyn qorǵaý da – asa mańyzdy mindet. Kaspııdi qutqarý úshin naqty sheshimderdi pysyqtaý kerek. Osy rette, túrki elderi ǵalymdarynyń yqpaldastyǵyn jandandyratyn kez keldi. Sonymen qatar Aral teńiziniń qurǵap, shólge aınalýy – alańdatarlyq másele. Ekologııalyq apatqa ushyraǵan aımaqty ońaltý kerek. Buǵan qosa, transshekaralyq ózenderdiń sý qoryn tıimdi paıdalaný qajet. Ol úshin sý únemdeý tehnologııalaryn keńinen qoldaný kerek, – dedi Qazaqstan Prezıdenti.

Memleket basshysy sózin qorytyndylaı kele, búgingi basqosýdyń mańyzdy máselelerdi jan-jaqty talqylaýǵa múmkindik bergenin atap ótip, osyndaı kezdesýler túrki áleminiń halyqaralyq deńgeıdegi bedelin arttyrýǵa jáne baýyrlastyq baılanystardy nyǵaıtýǵa zor úles qosatynyn aıtty.

Aıta keteıik, Shýshada «Kólik, kommýnıkatsııa jáne klımattyq ózgeristerdi baqylaý arqyly baıandy bolashaq qurý» taqyrybynda Túrki memleketteri uıymy beıresmı sammıti ótti.