Qazaqstan men Tatarstannyń taýar aınalymy 597 mıllıon dollardan asty

<p>Prezıdent Qasym-Jomart Toqaev Tatarstan Raısy Rýstam Mınnıhanovty qabyldady, dep habarlaıdy <a href="https://www.akorda.kz/kz/prezident-kasym-zhomart-tokaev-tatarstan-raisy-rustam-minnihanovty-kabyldady-2581439" target="_blank" rel="noopener">QazAqparat</a> Aqordanyń<a href="https://www.akorda.kz/kz/prezident-kasym-zhomart-tokaev-tatarstan-raisy-rustam-minnihanovty-kabyldady-2581439" target="_blank" rel="noopener"> baspasóz </a>qyzmetine silteme jasap.</p>

Kezdesý barysynda saýda-ekonomıkalyq, ınvestıtsııalyq, agrarlyq jáne mádenı-gýmanıtarlyq salalardaǵy yntymaqtastyqty damytý perspektıvalary talqylandy.

Memleket basshysy Qazaqstanmen aradaǵy ekonomıkalyq yqpaldastyq aýqymy boıynsha Tatarstan Reseı óńirleri arasynda jetekshi orynǵa ıe ekenin atap ótti.

– Qazaqstan men Tatarstannyń yntymaqtastyǵy qarqyndy damyp keledi jáne Reseı Federatsııasymen kópjaqty qarym-qatynasymyzda mańyzdy ról atqarady dep aıtýǵa tolyqtaı negiz bar. Ótken jyldyń qorytyndysy boıynsha Qazaqstan men Tatarstan arasyndaǵy taýar aınalymy 22,5 paıyzǵa ósip, 597 mıllıon dollardan asty. Mashına jasaý salasynda «Tatneft», «KAMAZ» kompanııalarynyń qatysýymen iri jobalar tabysty júzege asyrylyp jatyr. Budan da bólek jobalar bar, – dedi Qasym-Jomart Toqaev.

Rýstam Mınnıhanov Qazaqstan men Tatarstan arasyndaǵy saýda-ekonomıkalyq yntymaqtastyqty nyǵaıtý máselesine nazar aýdardy.

– Qurmetti Prezıdent, kezdesýge ýaqyt bólip, birlesken jobalar týraly baıandaýǵa múmkindik bergenińiz úshin Sizge alǵys aıtamyn. Sondaı-aq búgingi «Innoprom» kórmesi úshin rızashylyǵymdy bildiremin. Daıyndyq óte jaqsy júrgizilgen ári joǵary deńgeıde ótip jatyr. Biz 100-den astam adamnan jáne 38 kompanııadan turatyn úlken delegatsııany ala keldik. Bizdiń mindetimiz – iri bıznesti tanystyryp, saýda-ekonomıkalyq baılanystardy nyǵaıtý ǵana emes, sonymen qatar shaǵyn jáne orta kásiporyndarymyzdyń Sizdiń elińizben belsendi jumys isteýine septigimizdi tıgizý, – dedi Tatarstan Raısy.

Kezdesý barysynda Memleket basshysy Qazaqstan men Reseıdiń Óńiraralyq forýmy ózara yntymaqtastyq úshin ońtaıly alańǵa aınalǵanyn atap ótti. Bıyl qarasha aıynda Qostanaıda ótetin Forýmnyń taqyryby aýyl sharýashylyǵyna arnalmaq.

Prezıdent aýyl sharýashylyǵy ónimderin óńdeý isindegi mol tájirıbe men osy saladaǵy seriktestik áleýetiniń zor ekenin eskere otyryp, Tatarstan kásipkerleri bul baǵytqa qyzyǵýshylyq tanytatynyna senim bildirdi.