Qasym-Jomart Toqaev Sı Tszınpındi Aqordada qarsy aldy
Mártebeli meımannyń saparyna oraı Saltanatty rásimder zalynda qurmet qaraýyly sap túzep, onyń bastyǵy Memleket basshylaryna sálemdik baıanat berdi.
Osydan keıin Prezıdenttik orkestr eki eldiń memlekettik ánurandaryn oryndady.
Ánurandardy tyńdap bolǵannan keıin Qasym-Jomart Toqaev pen Sı Tszınpın kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi.
Sonan soń meıman men Prezıdent qurmetti qaraýyl sapynyń boıymen júrdi. Qytaı basshysy qurmetti qaraýyl bastyǵymen qoshtasty.
Qazirgi ýaqytta Memleket basshylary shaǵyn quramdaǵy kezdesýge ótti.
Eske sala keteıik, keshe Prezıdent Qasym-Jomart Toqaev Qazaqstanǵa memlekettik saparmen kelgen QHR Tóraǵasy Sı Tszınpındi elorda áýejaıynda kútip alǵan edi. Mártebeli qonaqty saltanatpen qarsy alý úshin áýejaıda Qurmet qaraýyly rotasy sap túzep turdy. Sondaı-aq Qazaqstan men Qytaı halyqtarynyń shynaıy dostyǵynyń belgisi retinde balalar eki eldiń jalaýyn jelbiretip, qoshemet kórsetti. Balalar Tóraǵa Sı Tszınpın bastaǵan QHR delegatsııasyna iltıpat bildirip, qytaı tilinde án shyrqady.
Sı Tszınpın qazaq balalaryn Qytaıǵa oqýǵa shaqyrdy.
Sonymen qatar keshe Qasym-Jomart Toqaev pen Sı Tszınpın dostyq ráýishte kezdesý ótkizdi.