Qasym-Jomart Toqaev: Reseımen yntymaqtastyǵymyz órshil baǵytta damyp keledi

<p>ASTANA. KAZINFORM &mdash; Prezıdent Qasym-Jomart Toqaev Reseı basshysy Vladımır Pýtınmen keńeıtilgen quramdaǵy kelissózde ózara yntymaqtastyqtyń órshil baǵyttan aınymaýy úshin ne qajet ekenin aıtty.&nbsp;</p>

«Búgin birqatar kelisim men deklaratsııaǵa qol qoıylyp, ortaq málimdemeler aıtylady. Munyń bári óte mańyzdy. Yntymaqtastyǵymyz órshil baǵytta damyp kele jatqanyn, osy baǵytynan aınymaıtyndaı jolǵa túskenin aıtqym keledi. Árıne, bizdiń mindetimiz, yntymaqtastyqtyń osy qarqynyn báseńdetpeý dep túsinemin. Eki el arasyndaǵy saýda-sattyq sátti damý úshin ınvestıtsııalyq yntymaqtastyq tereńdeı túskeni kerek. Sondaı-aq gýmanıtarlyq jáne bilim berý salasyndaǵy baılanystardyń órshil baǵytta damyǵany mańyzdy», - dedi Qasym-Jomart Toqaev.

Memleket basshysy Reseı prezıdentiniń eki aradaǵy saýda aınalymy týraly aıtqan málimetine toqtaldy.

«Shynymen de saýda kólemi artyp keledi. Onyń kólemin 30 mlrd dollarlyq mejege jetýdiń jaqsy múmkindikteri bar. Investıtsııalyq yntymaqtastyq týraly aıtsaq, búginde jalpy ınvestıtsııa kólemi 18,3 mıllıard dollar bolatyn 93 birlesken joba júzege asty. Sonyń nátıjesinde Qazaqstanda 22 myńnan astam jańa jumys orny ashyldy. Aldaǵy ýaqytta shamamen quny 29,5 mıllıard dollar bolatyn jáne 20 myńnan astam jumys ornyn qurýǵa múmkindik beretin 49 jobany qolǵa alýdy josparlap otyrmyz», - dedi Prezıdent.