Qasym-Jomart Toqaev pen Ýhnaagıın Hýrelsýh BAQ ókilderi úshin brıfıng ótkizdi

<p>ULAN-BATYR. KAZINFORM &mdash; Qazaqstan jáne Mońǵolııa prezıdentteri kelissózder qorytyndysy boıynsha BAQ ókilderi aldynda birlesken málimdeme jasady. Prezıdent, eń aldymen, Ulan-Batyrǵa memlekettik saparmen kelýge shaqyrǵany úshin Ýhnaagıın Hýrelsýhqa shynaıy rızashylyǵyn bildirip, bul sapardyń mán-mańyzy erekshe ekenin jetkizdi. Bul týraly Aqordanyń baspasóz qyzmeti málim etti.&nbsp;</p>

– Mońǵolııa – aımaqtaǵy mańyzdy kórshimiz. Biz bir-birimizge tilektespiz. Bizdiń tarıhymyz, rýhanı jáne mádenı qundylyqtarymyz – ortaq. Búgingi kezdesý qazaq tarıhynda aıryqsha oryn alatyn Joshy ulysynyń 800 jyldyǵymen tuspa-tus kelip otyr. Munyń eki halyq úshin sımvoldyq máni zor. Sońǵy jyldary qazaq-mońǵol qatynastary qarqyndy damyp keledi. Berik tatýlyqqa negizdelgen yntymaqtastyq strategııalyq seriktestikke ulasty. Biz Prezıdent Hýrelsýh myrzamen birge arnaıy deklaratsııaǵa qol qoıdyq. Bul qujat eki eldiń dostyǵyn nyǵaıta túsedi. Túrli saladaǵy tıimdi baılanystardy damytýǵa tyń serpin beredi, – dedi Memleket basshysy.

Qasym-Jomart Toqaev taraptar saýda-ekonomıkalyq jáne mádenı-gýmanıtarlyq yqpaldastyqty tereńdetý jóninde ýaǵdalasqanyn aıtty.

Foto: Aqorda

– Jalpy, kelissózder óte tabysty ótti deýge tolyq negiz bar. Atap aıtqanda, ekonomıkalyq qarym-qatynasty jandandyrýǵa kelistik. Qazaqstan men Mońǵolııa Azııadaǵy iri elder sanatynda. Sondyqtan ózara saýda aınalymy aýqymdy bolýǵa tıis. Byltyr saýda-sattyq kólemi 150 mıllıon dollarǵa jýyqtady. Bul kórsetkishti kóp uzamaı 500 mıllıon dollarǵa deıin jetkizý josparda bar. Ol úshin alys-beristegi taýar túrin kóbeıtý kerek. Sondaı-aq ekonomıkalyq yqpaldastyqty tejeıtin kedergilerdi joıý qajet. Eki el úkimeti naqty sharalardy qabyldaıdy. Búgin Saýda-ekonomıkalyq baılanysty arttyrý jónindegi jol kartasyna qol qoıdyq, – dedi Prezıdent.

Memleket basshysynyń aıtýynsha, eki el delegatsııasy aýyl sharýashylyǵy, óndiris, kólik-logıstıka jáne energetıka salasyna qatysty nátıjeli kelissóz júrgizgen.

– Qazaqstanda mal aýrýlaryna qarsy vaktsına shyǵarýǵa múmkindik bar. Osy oraıda, aldaǵy ýaqytta Mońǵolııada vaktsına óndirisin ashýǵa kelistik. Sonymen qatar jańa tehnologııany, qazba baılyqty birlesip ıgerýge toqtaldyq, ınvestıtsııa máselesin talqyladyq. Men Qazaqstannyń elektrondy úkimet, kıberqaýipsizdik jáne ǵarysh salasyndaǵy jetistikterine toqtaldym. Ózderińizge málim, elderimizde tabıǵı resýrs mol. Temir, fosfat, boksıt jáne basqa da sırek kezdesetin mıneral kenishterin barlap, ıgerý úshin birlese jumys isteımiz. Qazaqstan kásipkerleri Mońǵolııanyń taý-ken salasyn zertteýge daıyn. Kelissózder barysynda kólik-logıstıka máseleleri týraly áńgimelestik. Halyqaralyq dálizderdiń básekege qabiletin arttyrý – mańyzdy mindettiń biri. Ol úshin eki el arasyndaǵy jáne basqa memlekettermen kólik qatynasyn jetildirý qajet. Sonda elderimizdiń aýmaǵy arqyly tasymaldanatyn júk kólemi ulǵaıa túsedi. Transkaspıı baǵyty men Soltústik-Ońtústik dálizin tıimdi paıdalaný mańyzdy, – dedi Prezıdent.

Bul rette Memleket basshysy keshe Ulan-Batyrda ótken Іskerlik keńestiń alǵashqy otyrysynda kásipkerler aýqymdy kommertsııalyq kelisimsharttarǵa jáne ózge de qujattarǵa qol qoıǵanyna nazar aýdardy.

Eki el úkimetterine birlesken kásiporyndarǵa qolaıly jaǵdaı jasaý jóninde tapsyrma berilgen. Sonymen qatar Qasym-Jomart Toqaev aımaqaralyq alys-beristiń áleýetin utymdy paıdalanǵan jón dep sanaıdy.

– Búginde Astana men Ulan-Batyr arasynda baýyrlastyq baılanys ornaǵan. Osyndaı baılanysty basqa da aımaqtar arasynda damytý mańyzdy. Mońǵolııadaǵy qazaq dıasporasy – berik dostyqtyń altyn kópiri. Qandastarymyzǵa qamqor bolyp júrgen Mońǵolııa basshylyǵy men halqyna alǵys aıtamyz, – dedi Prezıdent.

Memleketter basshylary ǵylym men bilim, mádenıet salasyndaǵy yntymaqtastyqqa erekshe mán berip, jastardyń qarym-qatynasyn arttyra túsetin tyń bastamalardy talqylaǵan.

– Mońǵol jastary úshin Qazaqstannyń joǵary oqý oryndarynyń esigi ashyq. Sondaı-aq ǵalymdarymyz ben zııaly qaýym ókilderin ortaq tarıhymyzdy birlese zertteýge shaqyramyn. Osy mańyzdy qadamdar eki eldiń ósip-órkendeýine yqpal etedi dep senemin, – dedi Qasym-Jomart Toqaev.

Memleket basshysynyń aıtýynsha, Qazaqstan men Mońǵolııa halyqaralyq jáne aımaqtyq deńgeıde tyǵyz baılanys ornatqan ári kóptegen ózekti máselege qatysty ustanymdary uqsas.

– Jahandyq jáne aımaqtyq qurylymdar aıasynda yqpaldastyǵymyz damyp keledi. Ásirese, Azııadaǵy yntymaqtastyqty nyǵaıtýǵa nazar aýdardyq. Qazir geosaıası jaǵdaı kúrdeli. Sondyqtan Birikken Ulttar Uıymy jáne basqa da halyqaralyq qurylymdar aıasynda ózara qoldaý kórsetip, konsýltatsııa ótkizý mańyzdy. Biz ekijaqty jáne kópjaqty qarym-qatynasty damyta beremiz. Mońǵolııanyń Eýrazııa ekonomıkalyq odaǵymen Erkin saýda kelisimin jasaý nıetin qoldaımyz, – dedi Prezıdent.

Eske salsaq, 28-29 qazan kúnderi Prezıdent Qasym-Jomart Toqaev Mońǵolııaǵa memlekettik saparmen baratynyn habarladyq.

Memleket basshysy Prezıdent Ýhnaagıın Hýrelsýhpen kelissóz júrgizedi. Sondaı-aq Mońǵolııanyń Uly Memlekettik Hýralynyń Tóraǵasy Dashzegvıın Amarbaıasgalanmen jáne Premer-mınıstr Lývsannamsraın Oıýýn-Erdenemen kezdesedi. Myńdaǵan jyldarǵa sozylǵan tarıhı baılanysy bar eki halyqtyń qazir túrli saladaǵy qarym-qatynasy jaqsy deńgeıde. Eki el basshysynyń kezekti kezdesýinde saıası jáne ekonomıkalyq baılanystardy nyǵaıtý jaıy talqylanyp, birqatar kelissóz ótýi múmkin ekeni aıtyldy.

Sonymen qatar Qazaqstan men Mońǵolııaǵa arasyndaǵy uzaq jylǵy baılanys týraly Kazinform tilshisiniń materıalynan oqýǵa bolady.