Qasym-Jomart Toqaev pen Nıkol Pashınıan BAQ ókilderi úshin brıfıng ótkizdi
Qasym-Jomart Toqaev Armenııany Qazaqstannyń Ońtústik Kavkazdaǵy óte mańyzdy ári senimdi seriktesi retinde atap ótti.
– Bizdiń qarym-qatynasymyz myzǵymas dostyqqa jáne ózara qoldaýǵa negizdelgen. Ekijaqty baılanysty jandandyrý – ortaq maqsatymyz. Bizdiń aımaqtyq jáne halyqaralyq qaýipsizdikti, ózara yqpaldastyqty nyǵaıtý jolyndaǵy muratymyz – bir. Bıyl eki el arasyndaǵy Dostyq jáne yntymaqtastyq týraly shartqa 25 jyl toldy. Osy ýaqyt ishinde Astana men Erevan arasynda uzaq merzimge arnalǵan ózara tıimdi seriktestiktiń berik negizi qalandy. Biz Armenııamen jan-jaqty áriptestikti odan ári damytýǵa múddelimiz. Sondyqtan men úshin búgingi sapardyń mán-mańyzy aıryqsha, – dedi Prezıdent.
Memleket basshysynyń pikirinshe, búgingi kelissózder eki eldiń joǵary deńgeıdegi yntymaqtastyǵyn saqtaýǵa múddeli ekenin dáleldeıdi.
– Búgin kún tártibindegi kóptegen ózekti másele jan-jaqty talqylandy. Biz naqty kelisimderge qol jetkizdik. Pashınıan myrza bul týraly jańa ǵana tolyǵymen aıtty. Ásirese, saýda-ekonomıka jáne ınvestıtsııa salasyndaǵy baılanystyń aýqymyn keńeıtýge erekshe nazar aýdardyq. Ekijaqty saýda-sattyqtyń kólemi sońǵy bes jylda turaqty ósip keledi, – dedi Qasym-Jomart Toqaev.
Memleket basshysy eki el arasyndaǵy jan-jaqty qarym-qatynasty nyǵaıtý úshin mol áleýet bar ekenine nazar aýdardy.
– Taýar aınalymyn ulǵaıtýǵa serpin beretin jańa baǵyttardy izdestirý kerek degen ortaq pikirge keldik. Eksporttyq-ımporttyq taýarlar nomenklatýrasyn keńeıtý úshin naqty sharalar qabyldaýymyz kerek. Ol úshin qolda bar múmkindikti barynsha tıimdi paıdalaný qajet. Qazaqstan Armenııaǵa shyǵarylatyn eksport kólemin 350 mıllıon dollarǵa jetkizýge daıyn, – dedi Prezıdent.
Qasym-Jomart Toqaev ónerkásip, qurylys, kólik-logıstıka, aýyl sharýashylyǵy, qarjy, ınnovatsııa, týrızm jáne basqa da salalardaǵy yntymaqtastyqty jandandyrý mańyzdy ekenin aıtyp, armıan tarapyna birqatar birlesken ınvestıtsııalyq jobany júzege asyrýdy usyndy.
– Bul, ásirese, qazirgi kúrdeli geosaıası jáne geoekonomıkalyq ahýal kezinde asa ózekti. Osy baǵyttaǵy jumys Úkimetaralyq komıssııanyń jiti baqylaýynda bolady. Buǵan qosa bıznes-mıssııalardyń barys-kelisin jandandyra túsýimiz kerek. Bul qadam Іskerlik keńestiń tez arada qurylýyna yqpal etedi, eki eldiń bıznes ókilderi arasyndaǵy baılanysty kúsheıtedi. Sondaı-aq ınvestıtsııalyq qarym-qatynasty jaqsartýǵa múmkindik beredi, – dedi Qasym-Jomart Toqaev.
Prezıdent ózara tıimdi yntymaqtastyqty nyǵaıtý úshin kólik jáne logıstıka salasynyń mańyzdylyǵyna toqtalyp, Qazaqstan Armenııanyń Ońtústik Kavkazdaǵy kólik baılanysyn qaıta jandandyrýǵa umtylysyn joǵary baǵalaıtynyn jetkizdi.
– Bul rette qurmetti Premer-mınıstr Nıkol Pashınıannyń «Beıbitshilik toraby» bastamasyna oń kózqaraspen qaraımyz. Sonymen qatar biz eki eldiń astanasy men basqa da qalalary arasynda tikeleı áýe reısterin ashý týraly bastamany qoldadyq. Agroónerkásip salasyndaǵy taýar túrin kóbeıtý jáne olardy jetkizý máselelerin talqyladyq. Sondaı-aq Tsıfrlyq tehnologııa boıynsha yntymaqtastyqty damytý qajet. Qazaqstan armenııalyq seriktesterimen osy mańyzdy salada birlesken jobalardy júzege asyrýdy kózdep otyr, – dedi Memleket basshysy.
Qasym-Jomart Toqaev elimizdiń Armenııamen mádenı-gýmanıtarlyq baılanysty nyǵaıtýǵa basa mán beretinin aıtty.
– Bıyl Qazaqstanda Armenııanyń mádenıet kúnderi ótedi. Bul mańyzdy is-shara halyqtarymyzdy jaqyndata túsetini sózsiz. Ásirese, rýhanı baılanystarymyzdy jandandyrmaq. Sondaı-aq qurmetti Armenııa Premer-mınıstrimen Erevan qalasy kósheleriniń birine uly Abaıdyń esimin berý týraly kelisimge keldik. Al Astananyń bir kóshesine armıan álipbıiniń negizin qalaýshy, áýlıe Mesrop Mashtotstyń aty beriletin boldy. Oǵan qosa armıan qarpimen jazylǵan qypshaq tilindegi qoljazbalardy zertteıtin ǵylymı top qurý týraly bastamany quptadyq. Ony Eýrazııa ulttyq ýnıversıteti jáne Erevan memlekettik ýnıversıteti birlesip júzege asyrady, – dedi Prezıdent.
Qasym-Jomart Toqaev armıan sportshylaryn bıyl qyrkúıekte Qazaqstanda ótetin besinshi Dúnıejúzilik kóshpendiler oıyndaryna qatysýǵa shaqyrdy.
Qasym-Jomart Toqaev Armenııa Premer-mınıstrimen kelissózder barysynda aımaqtyq jáne jahandyq kún tártibindegi ózekti máseleler jóninde pikir almasqanyn málimdedi.
– Qazaqstan men Armenııa kópjaqty qurylymdar aıasynda tıimdi yntymaqtastyqty jalǵastyryp keledi. Elderimizdiń óńirlik jáne halyqaralyq deńgeıdegi kóptegen ózekti máselelerge qatysty ustanymdary – uqsas. Bastamalarymyzǵa ózara qoldaý bildirý dástúrge aınaldy. Muny zor rızashylyqpen atap ótkim keledi, – dedi Prezıdent.
Budan soń Memleket basshysy Ońtústik Kavkazda beıbitshilikke qol jetkizý jónindegi kúsh-jigerge óz úlesin qosýǵa Qazaqstannyń daıyn ekenin málimdedi.
– Biz aldaǵy ýaqytta da birlese jumys isteýge, beıbitshilik pen turaqtylyqty nyǵaıtý úderisine belsene atsalysýǵa kelistik. Biz Armenııa men Ázerbaıjannyń beıbitshilik shartyn jasaýǵa umtylysyn tolyq quptaımyz. Qurmetti Premer-mınıstr myrza jańa ǵana aıtqandaı, Qazaqstan barynsha qoldaý kórsetip, izgi qyzmetter mıssııasyn qolǵa alýǵa daıyn. ıAǵnı, eki el arasyndaǵy kelissózderdi júrgizý úshin óz alańyn usynady. Eń basty maqsatymyz – bizdiń dostas elderimizdi jaqyndastyryp, myzǵymas tatý kórshilikke, aımaqtaǵy beıbitshilik pen turaqty damýǵa jol ashý, – dedi Prezıdent.
Memleket basshysy búgingi kelissózderdiń ózara senim jáne túsinistik rýhynda ótkenine toqtalyp, bul sapar eki eldiń qarym-qatynasyna tyń serpin beretinine senim bildirdi.
Sóz sońynda Prezıdent Qasym-Jomart Toqaev Nıkol Pashınıandy Qazaqstanǵa resmı saparmen kelýge shaqyrdy.
Armenııa Premer-mınıstri búgingi kelissózder barysynda qol jetkizilgen ýaǵdalastyqtardyń mańyzdylyǵyn atap ótti.
– Bizdiń joǵary deńgeıdegi dıalogymyz jańa ǵana qol qoıǵan birlesken málimdeme arqyly rastaldy. Munyń ekijaqty qarym-qatynastarymyzdy odan ári damytýda mańyzy zor. Shynaıy ári ózara tıimdi baılanystardy nyǵaıtý jónindegi ustanymy úshin qazaq delegatsııasyna alǵys aıtamyn. Biz kópjaqty kún tártibin odan ári keńeıtý múmkindikterin aıqyndadyq. Sondaı-aq jańa jobalardy, sonyń ishinde kólik jáne logıstıka salasyndaǵy yntymaqtastyqty odan ári órkendetý perspektıvalaryn naqtyladyq. Biz taýar aınalymynyń turaqty ósimine qaramastan, saýda-ekonomıkalyq yntymaqtastyqty damytý úshin áleýetimizdiń tolyq paıdalanylmaı otyrǵanymen kelisemiz, – dedi Armenııa Úkimetiniń basshysy.