Qasym-Jomart Toqaev pen Emomalı Rahmon keńeıtilgen quramda kelissóz júrgizdi

<p>ASTANA. KAZINFORM &ndash; Memleketter basshylarynyń shaǵyn quramdaǵy kezdesýinen keıin resmı delegatsııa músheleriniń qatysýymen keńeıtilgen quramda kelissóz júrgizildi, dep habarlaıdy Aqordanyń baspasóz qyzmeti.</p>

Qasym-Jomart Toqaev bul memlekettik sapardyń basty maqsaty dostyqqa jáne ózara qoldaýǵa negizdelgen qazaq-tájik qatynastaryn múldem jańa deńgeıge kóterýdi kózdeıtin ortaq muratqa saı keletinin aıtty. Osy oraıda Memleket basshysy búgin qol qoıylatyn Qazaqstan Respýblıkasy men Tájikstan Respýblıkasy arasyndaǵy Odaqtastyq qatynastar týraly sharttyń aıryqsha mańyzyna nazar aýdardy.

– Atalǵan tarıhı qujat kókjıegimizdi keńeıtip, kópjaqty baılanystarymyzdy odan ári nyǵaıtýdyń negizin qalaıdy. Odaqtastyq qatynastardy damytý jolyndaǵy birlesken áreketimiz tutas Ortalyq Azııa óńiriniń ornyqty damýy men turaqtylyǵyn qamtamasyz etýge yqpal etedi. Osy múmkindikti paıdalana otyryp, qurmetti Emomalı Sharıpovıch, qazaq-tájik yqpaldastyǵyn keńeıtýge eleýli úles qosqanyńyz úshin Sizge rızashylyǵymdy bildiremin. Shýaqty Dýshanbe qalasyna kelgen saıyn zor qýanyshqa bólenemin. Árdaıym oń ózgeristerge kýá bolamyn. Sizdiń elińizde júrgizilip jatqan ekonomıkalyq reformalardy erekshe yqylaspen baqylaımyz, jetistikterińizge kýá bolyp otyrmyz. Dostas ári odaqtas el retinde buǵan shyn nıetimizben qýanamyz,– dedi Prezıdent.

Memleket basshysy qazaq-tájik yntymaqtastyǵy barlyq baǵytta qaryshtap damyp kele jatqanyn aıtty.

– Shyn máninde, aldyńǵy kezdesýler barysynda qol jetkizilgen ýaǵdalastyqtardyń bári dáıekti túrde júzege asyrylyp jatyr jáne eki el úkimetteriniń baqylaýynda tur. Muny ózim de qadaǵalap otyrmyn. Ótken aıda premer-mınıstrlerdiń orynbasarlary deńgeıinde Úkimetaralyq komıssııanyń kezekti otyrysy ótti. Jıynǵa qatysýshylar ekijaqty yqpaldastyq tetikterin egjeı-tegjeıli talqylady. Maqsatymyz – ózara saýda-sattyq kólemin 2 mıllıard dollarǵa jetkizý. Meniń oıymsha, buǵan elderimizdiń áleýeti jetedi, – dedi Memleket basshysy.

Sonymen qatar Qasym-Jomart Toqaev Qazaqstannyń mádenıet kúnderin uıymdastyrýǵa kórsetken qoldaýy, atap aıtqanda Dýshanbeniń ortalyǵynda qazaqtyń bas aqyny, hakim Abaı Qunanbaıulynyń eskertkish-bıýstin ornatqany úshin tájik tarapyna alǵys aıtyp, mundaı is-sharalar ortaq rýhanı-mádenı qundylyqtarymyzdy baıyta túsetinine nazar aýdardy.

Tájikstan Prezıdenti Emomalı Rahmon Odaqtastyq qatynastar týraly shartqa qol qoıý uzaqmerzimdi perspektıvada memleketaralyq baılanystardy jańa deńgeıge kóteretinin aıtty.

– Bul halyqtarymyzdyń túpkilikti múddesine saı keledi dep senemin. Sizdiń búgingi saparyńyz aıasynda birqatar is-sharalar uıymdastyrylady. Qazaqstannyń mádenıet kúnderi, Qazaq kınosynyń kúnderi ótedi. Eki eldiń zııaly qaýym ókilderi, ǵalymdar, áıelder men jastar, kásipkerler bas qosady. Munyń bári qos memleket pen halyqtyń dostyǵy berik, bir-birine jaqyn ekenin ári yntymaqtastyǵymyz nyǵaıyp kele jatqanyn kórsetedi, – dedi Emomalı Rahmon.

Kezdesý barysynda agroónerkásip, sý-energetıka, kólik-tranzıt salalaryndaǵy ekijaqty yntymaqtastyqty odan ári nyǵaıtýdyń negizgi basymdyqtary men mindetteri aıqyndaldy. Taraptar birlesken jobalardy iske qosýǵa, sondaı-aq bızneske qolaıly jaǵdaı jasaýǵa basa mán berýge ýaǵdalasty.

Sonymen qatar kelissózder kezinde tsıfrlandyrý, bilim berý jáne ǵarysh tehnologııalaryn paıdalaný baǵyttary boıynsha ózara tıimdi seriktestik aıasyn keńeıtýdiń múmkindikteri qarastyryldy.