Qasym-Jomart Toqaev Olga Rypakova atyndaǵy jeńil atletıka ortalyǵyna bardy

<p>ÓSKEMEN. KAZINFORM — Memleket basshysy Shyǵys Qazaqstan oblysyna jumys sapary kezinde Olga Rypakova atyndaǵy jeńil atletıka ortalyǵyn jáne onyń bazasynda ashylǵan Jeńil atletıka boıynsha Oblystaǵy balalar men jasóspirimderge arnalǵan olımpıadalyq rezerv mektebin aralap kórdi.</p>

Olımpıada chempıony Olga Rypakova Prezıdentke oqý-jattyǵý jıyndaryn jyl boıy turaqty túrde ótkizý úshin ortalyqta barlyq jaǵdaı jasalǵanyn aıtty. Mektep ashylǵan sátten beri Qazaqstannyń jeńil atletıkadan barlyq qysqy chempıonattary osy jerde ótkizilip keledi.

Foto: Aqorda

Búginde ortalyqta 713 jas óren jattyǵady. Olar respýblıkalyq jáne halyqaralyq jarystardan udaıy júldeli oralady. Sportshylar 2023 jyly 281 medal jeńip alǵan.

Olga Rypakova elimizde jeńil atletıkany damytýǵa qatysty birqatar usynysyn jetkizdi. Atap aıtqanda, ol óńirde sport medıtsınasy ortalyǵyn qurý mańyzdy dep sanaıdy.

Bul Altaıdyń ásem de janǵa jaıly tabıǵaty aıasynda ótetin jeńil atletıka boıynsha oqý-jattyǵý jıyndaryn emdeý-ońaltý protsedýralarymen sabaqtastyrýǵa múmkindik beredi.

Foto: Aqorda

2015 jyldan bastap sport arenasynda Olımpıada chempıony Olga Rypakova atyndaǵy týrnır ótkizilip keledi. Atalǵan jarysqa World Athletics Continental Tour deńgeıi berilgen. ıAǵnı, bul sportshylar álemdik reıtıngte upaı jınaı alatyn eń joǵary deńgeıdegi saıys sanalady.

Dańqty sportshy osy týrnırdiń mártebesin «kúmis» deńgeıge deıin kóterýge yqpal etýdi surady. Ol úshin jeńil atletıka manejiniń jabyndysyn jańartý, sondaı-aq júlde qorynyń somasyn arttyrý qajet

Memleket basshysy Premer-Mınıstrdiń orynbasary Tamara Dúısenova men ShQO ákimi Ermek Kósherbaevqa atalǵan máseleni baqylaýǵa alýdy tapsyrdy.

Prezıdent sportshylarmen áńgimelesip, memleket sport ınfraqurylymyn jaqsartýǵa erekshe kóńil bóletinin atap ótti.

Foto: Aqorda

— Munda balalardyń fýtbol oınaıtynyn, jeńil atletterdiń jattyǵatynyn kórip otyrmyn. Árıne, sportpen aınalysý kerek, sondaı-aq salaýatty ómir saltyn ustanǵan jón. Men sportty damytýǵa basa mán beremin. Barshańyzdyń myqty sportshy bolýlaryńyzǵa, qoǵamnyń basqa da salalarynda jetistikke jetýlerińizge tilektespin. Basty mindet — elimizdiń laıyqty azamaty bolý. Sizderdi myqty maman, Olımpıada chempıony, sportta úlken jetistikke jetken bapker jattyqtyrady. Sondyqtan úlgi alatyn adamdaryńyz bar, — dedi Memleket basshysy.

Qasym-Jomart Toqaevqa jergilikti jeńil atletterdiń basty jetistikteri jóninde málimet berildi. Atap aıtqanda, 2023 jyly Astanada ótken Azııa chempıonatynda Nadejda Dýbovıtskaıa áıelder arasynda bıiktikke qarǵyp sekirýden altyn medalǵa ıe boldy.

Jaqynda Tegeranda ótken jeńil atletıkadan XI Azııa chempıonatynda Elızaveta Matveeva jeńimpaz atandy. Al ótken jylǵy VI Respýblıkalyq spartakıadada aımaqtyń jeńil atletıka quramasy jalpykomandalyq esepte birinshi oryn aldy.

Foto: Aqorda

Memleket basshysy óskemendik jas sportshylarmen áńgimelesip, olarǵa izgi tilegin arnady

Jeńil atletıkamen aınalysyp júrgen 10-synyp oqýshysy Arýjan Ramazanova Olga Rypakova sııaqty dańqty sportshy bolýdy armandaıtynyn jetkizdi.

Al kishkentaı fýtbolshy, 4-cynyp oqýshysy Altaır Baqytuly Prezıdentten jabyq shaǵyn fýtbol stadıonyn salyp berýdi ótindi.