Qasym-Jomart Toqaev Muhtar Qul-Muhammedti qabyldady

<p>ASTANA. KAZINFORM - Memleket basshysy Qasym-Jomart Toqaev qoǵam qaıratkeri, akademık Muhtar Qul-Muhammedti qabyldady, dep habarlaıdy Aqordanyń baspasóz qyzmeti.&nbsp;</p>

Kezdesý barysynda Qazaqstannyń ǵylymy men mádenıeti, memlekettik jáne aqparattyq qaýipsizdigi, sondaı-aq halyqaralyq yntymaqtastyq máseleleri talqylandy.

Akademık jaqynda ótken Shanhaı yntymaqtastyǵy uıymy sammıtinde Memleket basshysynyń qaýipsizdikti nyǵaıtý, beıbitshilikti, turaqtylyq pen ornyqty damýdy qamtamasyz etý jónindegi bastamalaryna qoldaý bildirdi. Muhtar Qul-Muhammed álemdegi túrli qaqtyǵystardy retteý jáne olardyń aldyn alýdaǵy orta derjava retinde tanylǵan Qazaqstannyń róli arta túskendigin aıtty. Sonymen qatar sammıtte qabyldanǵan Astana deklaratsııasy men jıyrmadan astam qujattyń álemdegi qaýipsizdik pen yntymaqtastyqty odan ári nyǵaıtýǵa zor úles qosatynyn jetkizdi.

Qasym-Jomart Toqaev teń quqyly seriktestikke negizdelgen tıimdi aımaqtyq yqpaldastyqty qamtamasyz etý maqsatynda Qazaqstannyń kópjaqty yntymaqtastyǵynyń mańyzyn atap ótti. Prezıdenttiń aıtýynsha, halyqtar men memleketter arasyndaǵy ózara senim men tatý kórshilikti nyǵaıtýda qoǵamdyq dıplomatııa erekshe ról atqara alady.