Qasym-Jomart Toqaev Linde GmbH kompanııasynyń aǵa vıtse-prezıdentin qabyldady
Linde GmbH kompanııasynyń Taıaý Shyǵys, Eýropa jáne Afrıka boıynsha aǵa vıtse-prezıdenti Olıver Pfannmen áńgimelesý barysynda gaz jáne ınjenerlik tehnologııa salalaryndaǵy yntymaqtastyq máseleleri talqylandy.
Memleket basshysy «QazMunaıGaz» UK» AQ men Linde GmbH arasyndaǵy Yntymaqtastyq jáne ózara túsinistik týraly memorandýmǵa qol qoıylýyn quptady. Bul kelisim boıynsha elimizdiń munaı-gaz hımııasy salasynda qazirgi jáne keleshektegi jobalardy iske asyrý kózdelgen.
Buǵan deıin qol jetkizilgen kelisimderge sáıkes, Linde kompanııasy óz tehnologııasy negizinde polıetılen óndirisinde qoldanylatyn etandy ydyratý (krekıng) jáne aýany bólý (azot, tehnıkalyq aýa) qondyrǵylarynyń keńeıtilgen bazalyq jobasyn ázirlep jatyr.
Prezıdentke qýaty jylyna 1,3 mıllıon tonna bolatyn karbamıd óndirisine qatysty jobaǵa kompanııanyń birlese ınvestıtsııa salýǵa qyzyǵýshylyq tanytyp otyrǵany aıtyldy.
Qasym-Jomart Toqaev atalǵan óndiristiń munaı hımııasy ónerkásibin damytýǵa ǵana emes, aýyl sharýashylyǵy úshin de mańyzy zor ekenin, ásirese óndiriletin tyńaıtqyshtyń kúrish pen dándi daqyldardy ósirý kezinde keńinen qoldanylatynyn atap ótti.
Olıver Pfann aımaqtyq naryqtyń keleshegi zor ekenine nazar aýdaryp, Linde kompanııasy Qazaqstannyń munaı-gaz hımııasy salasynda ınnovatsııalyq jáne ornyqty sheshimderdi iske asyrý úshin uzaqmerzimdi ári tabysty yntymaqtastyqqa daıyn ekenin málimdedi.
Linde GmbH – mashına jasaý, sondaı-aq ónerkásip gazdaryn jobalaý jáne óndirý salasyndaǵy jetekshi álemdik kompanııa.
Byltyr kompanııanyń jyldyq aınalymy 33,36 mıllıard eýrony qurady.
Kompanııanyń dúnıejúzindegi kásiporyndarynda 60 myńnan astam adam jumys isteıdi.
Osyǵan deıin Qazaqstan men Germanııa Prezıdentteri kópjaqty yntymaqtastyqty nyǵaıta túsýge ýaǵdalasqany týraly jazdyq.
Eske salsaq, keshe QR Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary bastaldy.
Prezıdent Germanııa Kantsleri Olaf Sholtstiń vedomstvosyna baryp, betpe-bet formatynda kelissóz júrgizdi.
Kelissózderden keıin tilshilerge bergen baspasóz máslıhatynda Prezıdent Qazaqstannyń Reseımen ekijaqty tarapta jáne tıisti ıntegratsııalyq birlestikter sheńberinde turaqty dostyq qarym-qatynasta ekenin aıtty.
Ýkraınadaǵy jaǵdaıǵa qatysty Qazaqstannyń ustanymy jóninde pikir bildirdi. Ózara aıyptaýlardy toqtatyp, iskerlik kelissózder júrgizýge shaqyrdy.
Qazaqstan men Germanııanyń iri jáne orta bıznesteri arasynda mańyzdy kommertsııalyq kelisimder bekitildi.
Memleket basshysy Germanııanyń Federaldyq kantslerimen keńeıtilgen quramda kelissóz júrgizdi. Prezıdent júrgizilgen kelissózder qazaq-german qatynastaryn odan ári nyǵaıtýǵa eki taraptyń nıetti ekenin taǵy da rastaǵanyn atap ótti.