Qasym-Jomart Toqaev Qosshy qalasynyń damý josparymen tanysty
Qosshy qalasynyń ákimi Gaıdar Qasenovtiń aıtýynsha, eldi mekenge 2021 jyly oblystyq mańyzy bar qala mártebesi berilgennen keıin turǵyndar sany 110 myń adamǵa jetken.
Jalpy qalanyń bas jospary aıasynda 1,5 mıllıon sharshy metr turǵyn úı men 45 áleýmettik nysannyń qurylysy josparlanǵan.
Sońǵy eki jylda qalada úsh mektep paıdalanýǵa berildi. Taǵy bir mektep qurylysy aıaqtalýǵa jaqyn. Aldaǵy ýaqytta «Jaıly mektep» ulttyq jobasy aıasynda úsh bilim oshaǵyn, sondaı-aq eki balabaqsha salý kózdelgen.
Densaýlyq saqtaý salasynda bir memlekettik emhana, memlekettik-jekemenshik áriptestik sheńberinde eki emhana jumys isteıdi.
Qala ákimi qazirgi kezde jekemenshik ınvestıtsııa esebinen janynda 1000 kelýshini qabyldaıtyn emhanasy bar 300 oryndyq kópbeıindi aımaqtyq aýrýhana salynyp jatqanyn jetkizdi.
Jańa aýrýhanada terapııa, onkologııa, nevrologııa jáne perzentahana bólimsheleri bolady. Medıtsınalyq mekeme tek Qosshy halqyna ǵana emes, jaqyn mańdaǵy aýdandardyń turǵyndaryna da qyzmet kórsetedi dep josparlanyp otyr.
Bıyl mamyr aıynda «Alan» dene shynyqtyrý-saýyqtyrý kesheni ashyldy. Keshende balalarǵa jáne eresekterge arnalǵan basseın, jattyǵý jáne sport zaldary bar.
Al Qosshy turǵyndarynyń ıgiligine kelesi jyly beriletin Qoǵamdyq mádenı-sport ortalyǵynda ınteraktıvti bilim berý bólimi, sport zaly, tennıs, basketbol, fýtbol, voleıbol alańdary, kınoteatr, kórme zaly, kitaphana, dárishana, amftıteatr ashylady.
Memleket basshysy Qosshy qalasynda qurylys jumystary qarqyn ala bastaǵanyn eskere otyryp, oblys ákimine eldi mekendegi ınjenerlik-kommýnaldyq ınfraqurylymdy damytý jáne gaz qubyryn tartý máselelerine aıryqsha mán berýdi tapsyrdy.