Qasym-Jomart Toqaev: Qazaqstan sanktsııalyq teketiresti keri nátıje dep sanaıdy

<p>Memleket basshysy Qasym-Jomart Toqaev Germanııaǵa resmı sapary barysynda <a href="https://kaz.inform.kz/" target="_blank" rel="noopener">QazAqparattyń</a> Berlındegi menshikti tilshisine qazirgi saıası jaǵdaılarǵa qatysty eksklıýzıvti pikir bildirdi.&nbsp;</p>

– Keıbir reseılik BAQ pen saıası qaıratkerler Germanııaǵa resmı saparyńyz barysynda Berlınde ótken baspasóz máslıhatyndaǵy málimdemelerińizge syn aıtty. Olar Qazaqstan Reseımen yntymaqtastyqtan alshaqtap, Batyspen jaqyn baılanys ornatyp jatyr dep otyr. Mundaı aıyptaýǵa ne aıtar edińiz?

«Qazaqstan «antıreseılik» el emes. Biz álemdegi eń uzyn qurlyqtyq shekara baılanystyratyn Reseımen jan-jaqty yntymaqtastyq baǵytyn berik ustanyp kelemiz. Baspasóz máslıhatynda aıtqanymdaı, eki eldiń ártúrli salalarda, sonyń ishinde saýda jáne gýmanıtarlyq baılanystarda ejelden qalyptasqan dástúri bar. Sanktsııalarǵa keletin bolsaq, sanktsııalyq teketirester jahandyq daǵdarystyń shıelenisýi jaǵdaıynda buzyla bastaǵan halyqaralyq qatynastardy jaqsartý turǵysynan múldem keri áser etedi. Men bul jóninde BUU Bas Assambleıasynyń jaqynda ótken sessııasynda jáne basqa da sóılegen sózderimde aıtqan bolatynmyn.

Qazaqstanda sanktsııalyq shekteý qoıylǵan taýarlar joqtyǵyn jáne ondaı taýarlardyń satylmaıtynyn atap ótkim keledi. Sondaı-aq Qazaqstan Reseıge parallel ımportqa qatyspaıdy. Dástúrli taýarlar saýdasyna keler bolsaq, bul baǵyt damyp keledi. Byltyr Qazaqstan men Reseı arasyndaǵy taýar aınalymy 25 mıllıard dollarǵa jetti.

Jaqynda Astanada «Innoprom» kórmesi tabysty ótti. Oǵan Premer-mınıstr Mıhaıl Mıshýstın bastaǵan reseılik delegatsııa keldi. Bul rette Qazaqstan sanktsııalyq shekteýlerdi eskerýge májbúr jáne bul másele boıynsha tıisti halyqaralyq uıymdarmen baılanys jasap otyrmyz.

Múmkindikti paıdalana otyryp, Reseı men Ýkraına arasyndaǵy beıbitshilik týraly kelissózderde ózara tıimdi jol tabý jónindegi úndeýime dıplomattardyń nazaryn aýdarǵym keledi. Bul – óte mańyzdy. Óıtkeni álem jalpy adamzat úshin saldary aýyr bolatyn jáne qasiretke ákep soqtyratyn qaqtyǵystyń aldynda tur», - dep jaýap berdi Prezıdent.

Eske salsaq, keshe QR Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary bastaldy.

Prezıdent Germanııa Kantsleri Olaf Sholtstiń vedomstvosyna baryp, betpe-bet formatynda kelissóz júrgizdi.

Kelissózderden keıin tilshilerge bergen baspasóz máslıhatynda Prezıdent Qazaqstannyń Reseımen ekijaqty tarapta jáne tıisti ıntegratsııalyq birlestikter sheńberinde turaqty dostyq qarym-qatynasta ekenin aıtty. Ýkraınadaǵy jaǵdaıǵa qatysty Qazaqstannyń ustanymy jóninde pikir bildirdi. Ózara aıyptaýlardy toqtatyp, iskerlik kelissózder júrgizýge shaqyrdy. 

Qazaqstan men Germanııanyń iri jáne orta bıznesteri arasynda mańyzdy kommertsııalyq kelisimder bekitildi.

Memleket basshysy Germanııanyń Federaldyq kantslerimen keńeıtilgen quramda kelissóz júrgizdi. Prezıdent júrgizilgen kelissózder qazaq-german qatynastaryn odan ári nyǵaıtýǵa eki taraptyń nıetti ekenin taǵy da rastaǵanyn atap ótti.