Qasym-Jomart Toqaev: Qazaqstan Pýent-Nýar portynyń áleýetin paıdalanýǵa múddeli
«Biz aýyl sharýashylyǵy, óndiris, kólik-logıstıka jáne energetıka salasyna qatysty kelissóz júrgizdik. Sondaı-aq jańa tehnologııalar, qazba baılyqtaryn birlesip ıgerý, ınvestıtsııa máselesin talqyladyq. Men Qazaqstannyń elektrondy úkimet, kıberqaýipsizdik jáne ǵarysh salasyndaǵy jetistikterine toqtaldym. Eki el úkimetterine ózara saýda-sattyq kólemin arttyrý úshin naqty sharalar qabyldaý jóninde tapsyrma berýge kelistik. Qazaqstannyń Kongoǵa dándi daqyldardy eksporttaýǵa qatysty áleýetiniń mol ekenine nazar aýdardyq. Ózderińizge málim, eki eldiń de tabıǵı resýrstary mol», — dedi Memleket basshysy.
Prezıdenttiń atap ótýinshe, eki eldiń temir, fosfat, boksıt jáne basqa da sırek kezdesetin mıneral kenishterin barlaý jáne ıgerý úshin birlese jumys isteýge múmkindigi bar.
«Qazaqstan kásipkerleri Kongonyń taý-ken salasyn zertteýge daıyn ekenin kelissóz barysynda atap óttim. Sonymen qatar eki eldiń kólik-logıstıka salasyndaǵy qarym-qatynasy jan-jaqty talqylandy. Kongo Respýblıkasy Ortalyq Afrıka aımaǵynyń qaqpasy, al Pýent-Nýar porty osy qaqpanyń kilti. Bul teńiz aılaǵynyń múmkindikteri óte joǵary. Qazaqstan osy porttyń áleýetin paıdalanýǵa múddeli. Biz ózara tıimdi yntymaqtastyqty damytýǵa barynsha kúsh salýymyz kerek. Sondyqtan men Kongo Respýblıkasynyń basshylyǵyn, kásipkerlerin kelesi jyly ótetin Astana halyqaralyq forýmyna shaqyrdym. Olar forým kezinde Qazaqstannyń ekonomıkalyq áleýetimen tanysa alady», — dedi Qasym-Jomart Toqaev.