Qasym-Jomart Toqaev Qazaqstan men Ózbekstan seriktestikti nyǵaıtýǵa nıetti baǵyttardy atady

<p>ASTANA. KAZINFORM &ndash; Bıyl jyldyń sońyna deıin Qazaqstan men Ózbekstannyń aımaqaralyq yntymaqtastyq forýmy ótedi. Bul týraly Aqordada Ózbekstan Prezıdenti Shavkat Mırzıeevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.</p>

«Kelissóz barysynda «Ortalyq Azııa ónerkásiptik kooperatsııa» halyqaralyq ortalyǵy týraly da aıtyldy. Bul ortalyq eki eldiń shekarasynda salynyp jatyr. Ony tezirek iske qosý asa mańyzdy. Sebebi atalǵan joba ózara saýda-sattyqty arttyrýǵa zor yqpal etedi. Ekonomıkalyq qarym-qatynastyń tiregi – ónerkásip salasyndaǵy yntymaqtastyq. Biz buǵan basa mán berip, jańa ári aýqymdy jobalardy qolǵa alý qajettigine nazar aýdardyq. Ortaq ınvestıtsııalarymyz da az emes. Qazir jalpy quny 3 mlrd dollardan asatyn 70-ke jýyq joba bar», - dedi Prezıdent.

Memleket basshysy mashına jasaý, metallýrgııa, avtokólik qurastyrý, turmystyq tehnıka óndirý, toqyma ónerkásibi, farmatsevtıka jáne basqa da baǵyttaǵy jobalar tabysty iske asyrylyp jatqanyn aıtty.

«Munyń bári eki elge 14 myńnan astam jańa jumys ornyn ashýǵa múmindik beredi. Energetıka, kommýnıkatsııa, ǵaryshtyq tehnologııalar, tsıfrlandyrý sııaqty salalardyń áleýeti mol. Biz osy baǵyttaǵy seriktestikti nyǵaıtýǵa basa nazar aýdaryp otyrmyz. Keshe Astanada qazaq-ózbek bıznes forýmy jáne Іskerlik keńestiń 6-otyrysy ótti. Onda kásipkerlerimiz iri kommertsııalyq kelisimsharttarǵa jáne ózge de qujattarǵa qol qoıdy. Úkimetterimiz birlesken kásiporyndardyń tabysty jumys isteýine qolaıly jaǵdaı jasaý qajet. Sondaı-aq aımaqaralyq baılanystyń áleýetin tıimdi paıdalaný asa mańyzdy. Qarym-qatynasty nyǵaıtýǵa aımaqtar arasynda jasalǵan kelisimder de edáýir yqpal etedi. Osy rette jyldyń sońyna deıin kezekti aımaqaralyq yntymaqtastyq forýmyn ótkizý josparlanyp otyr», - dedi Qasym-Jomart Toqaev.