Qasym-Jomart Toqaev: Energetıka sektory eki el ekonomıkasynyń negizgi qozǵaýshy kúshi
19:29, 14 Aqpan 2024
<p>DOHA.KAZINFORM – Qazaq-qatar ınvestıtsııalyq dóńgelek ústelinde Qasym-Jomart Toqaev Qazaqstan munaı jáne gaz qoryn barlaý úshin mol múmkindikter usynýǵa daıyn ekenin aıtty. Bul týraly Aqordanyń baspasóz qyzmeti málim etti. </p>
– Biz mańyzdy ken oryndaryn ashý úshin álemdegi úzdik tájirıbelerdi engizip jatyrmyz. Osyǵan oraı energetıka salasyndaǵy Qatar kompanııalaryn geologııalyq barlaý, munaı hımııasy, munaı men gazdy tasymaldaý, óńdeý jobalaryna belsendi atsalysýǵa shaqyramyn. Búgin Power International Holding kompanııasymen Qashaǵan ken ornynda gaz óńdeý zaýyttarynyń, sondaı-aq Beıneý – Bozoı – Shymkent jáne Aqtóbe – Qostanaı gaz qubyrlarynyń qurylysy týraly kelisimderge qol qoıý josparlanyp otyr. Bul – keleshegi zor bastama. Qashaǵanda taǵy bir gaz óńdeý zaýytyn salýǵa qatysty kelissózder kóp uzamaı naqty nátıje beredi dep úmittenemiz, – dedi Qazaqstan Prezıdenti.Sonymen qatar Memleket basshysy jańartylatyn energııa sektoryndaǵy yqpaldastyq máselesine arnaıy toqtaldy. Qazaqstannyń bir trıllıon-kılovatqa baǵalanǵan jańartylatyn energııa kózderiniń áleýeti osy saladaǵy jahandyq oıynshylardyń nazaryn aýdardy. Jalpy alǵanda, olar 43 gıgavatt qýat óndiretin birneshe jobany júzege asyrýǵa mindetteme aldy.
– Nebras Power kompanııasynyń Qazaqstanda qýaty 350 megavatt bolatyn sý elektr stantsııasyn salý nıetin, sondaı-aq Pearl Overseas kompanııasynyń qýaty 1,1 gıgavatt bolatyn bý-gaz qondyrǵysyn ornatý josparyn joǵary baǵalaımyz. Biz osy asa mańyzdy sektordaǵy óndiris, tehnologııa transferti jáne tájirıbe almasý baǵyttary boıynsha seriktestikti jalǵastyrýǵa múddelimiz, – dedi Prezıdent.