Qasym-Jomart Toqaev Doha forýmynyń paneldik sessııasyna qatysty

<p>ASTANA. KAZINFORM &ndash; Memleket basshysy Newsmaker Interview formatyndaǵy arnaıy sessııaǵa qatysyp, moderator, SNN jýrnalısi Djýlııa Chatterleıdiń suraqtaryna jaýap berdi.</p>

Qazaqstan Prezıdenti, eń aldymen, BUU-nyń tıimdi qyzmetiniń mańyzy men orta derjavalardyń ýaqyt ótken saıyn artyp kele jatqan róli týraly aıtty.

– BUU ámbebap uıym retinde adamzat úshin óte qajet. Sebebi onyń balamasy joq. Ókinishke qaraı, iri derjavalar álemdegi beıbitshilik pen turaqtylyqty tolyq saqtaı almaı otyr. Al búgingi ahýal kóptegen eldi, sonyń ishinde Qazaqstandy da alańdatady. Sondyqtan Birikken Ulttar Uıymy reformalaýdy qajet etedi. Іri derjavalar arasynda ymyralastyq bolýy kerek dep sanaımyz. Olardyń kelisimge kele almaýy saldarynan Qaýipsizdik Keńesi tyǵyryqqa tireldi. Qazaqstan sııaqty orta derjavalar aımaqtyq deńgeıde, sondaı-aq jahandyq keńistikte beıbitshilik pen qaýipsizdikti ilgeriletýde óte mańyzdy ról atqara alady, – dedi Qasym-Jomart Toqaev.

Memleket basshysy álemdik saýdadaǵy qaıshylyqtarǵa qatysty kózqarasyn jetkizdi.

– Meniń oıymsha, saýda qaqtyǵystary, sonyń ishinde tarıf qoldaný sharalary – ońtaıly sheshim emes. Bul – tym kúmándi saıasat. Qazaqstan DSU-ǵa múshe el retinde osy mańyzdy saýda-ekonomıkalyq uıymnyń barlyq normalary men erejelerin qatań saqtaıdy. Biz kedergiler men qaqtyǵystardy qoldamaımyz. Qazaqstan ázirge ondaı qıyndyqtarǵa tap bola qoıǵan joq. Óıtkeni óńirdegi kórshilerimizben jáne basqa da memlekettermen syndarly ári ózara tıimdi qarym-qatynas ustanamyz. Sondyqtan bizdiń aımaqta osyǵan uqsas keleńsizdikter týyndamaıdy dep oılaımyn. Bul rette barlyq iri derjavalardy mundaı qysym kórsetý tetikterin qoldanbaýǵa shaqyramyz, – dedi Prezıdent.

Qasym-Jomart Toqaev Qazaqstannyń syrtqy saıasatyna, Ýkraına men Taıaý Shyǵystaǵy jaǵdaıdy retteýge qatysty qoıylǵan saýaldarǵa jaýap berdi. Sondaı-aq el damýyndaǵy jastardyń róline toqtaldy.