Qasym-Jomart Toqaev: Bul - Alash arystarynyń azattyq jolyndaǵy arpalysy aqtalǵan kún

<p>Elin súıgen erlerdiń otanshyldyǵy jáne olardyń ult múddesine adaldyǵy árdaıym keıingi urpaqqa úlgi-ónege bolýǵa tıis. Bul týraly Aqordada Respýblıka kúninen oraı birqatar azamatqa memlekettik nagradalar men syılyqtar tapsyrýǵa arnalǵan saltanatty rásimde Memleket basshysy Qasym-Jomart Toqaev aıtty, dep habarlaıdy Kazinform.</p>

«Elimizdiń eń basty meıramy - Respýblıka kúni qutty bolsyn! Bul - qazaqtyń memlekettilik dástúri qaıta jańǵyrǵan tarıhı kún, Kók túrikter dáýirinen Altyn orda, Qazaq handyǵy zamanynan kele jatqan eldigimiz tamyryn tartqan kún. Bul - Alash arystarynyń azattyq jolyndaǵy arpalysy aqtalǵan kún. Halqymyzda «Egemen bolmaı, el bolmas» degen sóz bar. Osydan 33 jyl buryn tarıhı ádildik ornady. Qazaqstannyń memlekettik egemendigi týraly deklaratsııa qabyldandy. Osy mańyzdy qujat jurtymyzdyń azattyq alýyna jol ashty», - dedi Prezıdent.

Memleket basshysy shyn máninde egemendik deklaratsııasyn qabyldaý ońaıǵa soqpaǵandyǵyn basa nazar aýdartty.

«Elimizdiń ulttyq quramy birkelki emes edi. Sol kezdegi Parlamentte, ıaǵnı, Joǵarǵy keńeste jáne búkil qoǵamymyzda uzaq pikirtalas, qyzý talqylaý boldy. Qujattyń ár sózin, ár babyn qorǵaýǵa týra keldi. Álıhan Bókeıhan «Bostandyqqa aparatyn jalǵyz jol ulttyq yntymaq qana» degen. El aǵalary halqymyzdyń ardaqty ulynyń bul ósıetine adal boldy. Olar jaýapty sátte uıymshyldyqpen ult múddesin qorǵaı bildi. Aqjoltaı qujat jurtymyzdyń talap-tilegine saı jazyldy. Otanshyl azamattardyń aqyl-parasatynyń arqasynda qabyldandy», - dedi Qasym-Jomart Toqaev.

Prezıdent olardyń syn saǵattaǵy batyldyǵy naǵyz erlik dep baǵalaýǵa bolatyndyǵyn basa aıtty.

«Biz qazir Ádiletti Qazaqstandy quryp jatyrmyz. Sondyqtan ótken zamannyń qaıratkerlerine, olardyń eńbegine laıyqty, ádiletti baǵa berip otyrýymyz kerek. Azattyq jylnamasynda Salyq Zımanov, Serikbolsyn Ábdildın, Qarataı Turysov, Zınaıda Fedotova, Erik Asanbaev, Ábish Kekilbaev, Qaırat Saparǵalıev, Sultan Sartaev, Ózbekáli Jánibekov, Oljas Súleımenov, Aleksandr Knıagının, Myrzataı Joldasbekov, Ómirbek Baıgeldi, Qýanysh Sultanov, Sergeı Tereşenko jáne taǵy basqa kóptegen tulǵanyń esimin qurmetpen atap ótý kerek. Elin súıgen erlerdiń otanshyldyǵy jáne olardyń ult múddesine adaldyǵy árdaıym keıingi urpaqqa úlgi-ónege bolýǵa tıis. Biz tarıhı ádildik jolyn berik ustanýymyz kerek. Osy oraıda Tuńǵysh Prezıdent Nursultan Nazarbaevtyń tarıhı rólin atap ótken jón. Sebebi, ol elimizdiń táýelsiz memleket atanyp, tuǵyryn bekemdeýge orasan zor eńbek sińirdi», - dedi Memleket basshysy.