Qasym-Jomart Toqaev Armenııa Parlamentiniń Tóraǵasymen kezdesti

<p>EREVAN. KAZINFORM &ndash; Qazaqstan Prezıdenti Erevandaǵy Parlament ǵımaratynda Armenııa Respýblıkasy Ulttyq jınalysynyń Tóraǵasy Alen Sımonıanmen kezdesý ótkizdi.</p>

Memleket basshysy Armenııa men Qazaqstan arasynda tyǵyz qarym-qatynas ornaǵanyn jáne eki eldi ortaq tarıh pen ejelgi mádenı baılanystar biriktiretinin atap ótti.

Prezıdenttiń aıtýynsha, Premer-mınıstr Nıkol Pashınıanmen júrgizilgen kelissózder barysynda saýda-ekonomıka, ınvestıtsııa, kólik-logıstıka salalarynda mańyzdy ýaǵdalastyqtarǵa qol jetkizilgen. Qasym-Jomart Toqaev bul kelisimderdi zańnamalyq turǵydan tıimdi qamtamasyz etý, olardyń júzege asyrylýyna parlamentter tarapynan baqylaýdy kúsheıtý máselesine aıryqsha mán berý qajet ekenine nazar aýdardy.

Kezdesýde Memleket basshysy elimizde óziniń bastamasymen aýqymdy saıası jańǵyrý úderisi júrgizilip jatqanyn, onda parlamentarızmdi damytýǵa erekshe basymdyq berilgenin aıtty.

Qazaqstan Prezıdenti zań shyǵarý organdary deńgeıindegi belsendi yqpaldastyqqa kóńili tolatynyn jetkizdi. Sondaı-aq eki eldiń osynaý mańyzdy baǵyttaǵy qatynastaryn damytýdy turaqty túrde qoldap kele jatqany úshin Ulttyq jınalys Tóraǵasyna rızashylyq bildirdi.

Alen Sımonıan Armenııa men Qazaqstan arasyndaǵy kópjaqty jáne ekijaqty formattaǵy ózara yntymaqtastyq deńgeıi joǵary ekenin atap ótti.

Sondaı-aq ol eki eldiń parlamentaralyq platformalardaǵy yqpaldastyǵynyń mańyzyna erekshe nazar aýdardy.

Áńgimelesý barysynda mádenı-gýmanıtarlyq saladaǵy yntymaqtastyqty damytý, Qazaqstan men Armenııa aımaqtary arasyndaǵy baılanystardy nyǵaıtý perspektıvalary qarastyryldy.