Qasym-Jomart Toqaev almatylyq oqýshyǵa sý tasqynynan zardap shekkenderge kómekteskeni úshin alǵys aıtty
Almaty ákimi Erbolat Dosaev Memleket basshysy Qasym-Jomart Toqaevtyń atynan Aqmola oblysyndaǵy sý tasqynynan zardap shekken jandarǵa kómek kórsetkeni úshin 3-synyp oqýshysy Dáýlen Baýyrjanulyna alǵys hat tabys etti.
Qazaqstan Prezıdenti 9 jastaǵy Dáýlenniń ıgi isin joǵary baǵalap, onyń áreketin naǵyz otanshyldyqtyń úlgisi dep atady. Qasym-Jomart Toqaev alǵys hatynda balanyń boıyna asyl qasıet darytqan ata-anasy men ustazdaryna rızashylyǵyn bildirdi. Memleket basshysy Dáýlen sııaqty aqyldy ári zerek balalar bar eldiń bolashaǵy jarqyn ekenin erekshe atap ótti.
Almatydaǵy Sh.Ýálıhanov atyndaǵy №12 gımnazııanyń 3-synyp oqýshysy Dáýlen Baýyrjanuly zııatkerlik olımpıadaǵa qatysý úshin Qalan.kz portalyna tirkelgen. Jeńisi úshin berilgen bonýstaryn jınaǵan. Áleýmettik jelilerde sý tasqynynan zardap shekken turǵyndardyń sýretin kórip, oılanbastan kómektesýge sheshim qabyldap, jınalǵan 25 myń teńgesin arnaıy qorǵa jibergen.
«Elimizde bolyp jatqan tabıǵı apat týraly estip, kómekteskim keldi. Men jınalǵan barlyq aqshany kómek retinde jiberýdi sheshtim. Aldymen muny ata-anama aıtyp edim, olar meniń bul oıymdy birden qoldady», - dedi Dáýlen.
Almatylyq oqýshynyń muǵalimi Saǵadat Jubanyshbekovanyń aıtýynsha, ol úzdik oqýshylar qatarynan. Matematıka, ınformatıka, jaratylystaný ǵylymdaryn jaqsy kóredi. Birneshe ret «Altyn saqa», «Kengýrý», «Aqbota» olımpıadalarynyń jeńimpazy atanǵan.