Kásibı jýrnalıster belsendi túrde atsalysýy tıis - Bas redaktorlar klýby Prezıdent Joldaýyna qatysty
«
Memleket basshymyz Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda kópten beri halyqtyń oıynda júrgen ótkir de ózekti máselelerdiń deni qamtylǵan. Áleýmettik salada buqaranyń basym bóliginiń problemasyn naqty sheshetin qadamdar jasaldy. Qoǵam tarapynan aıtylyp jáne de jıi talqylanyp júrgen suraqtarǵa da naqty jaýaptar berildi. Máselen, eń tómengi jalaqy deńgeıin 60 myń teńgeden 70 myń teńgege deıin kóterý týraly sheshim 1,8 mıllıon azamattyń tabysyna tikeleı áser etedi
», - delingen málimdemede.
Málimdeme avtorlary Ulttyq qordyń ınvestıtsııalyq kirisiniń teń jartysyn 18-ge tolmaǵan qazaqtandyqtardyń shotyna aýdaryp otyrý týraly bastamany Birikken Arab Ámirlikteriniń áleýmettik baǵdarlamasyna uqsatady. Aıtýlarynsha, keıingi otyz jylda Qazaqstanda da sondaı ıgilik jasalady dep oılaýdyń ózi múmkin emesteı kóringen eken.
«
Bul – Qazaqstan baılyǵynyń shyn mánindegi ıesi halyq ekenin, bolashaǵymyz – jastar ekenin kórsetetin úlken qadamdardyń basy dep baǵamdadym. Endigi másele, Ulttyq qordyń Norvegııa elindegideı tıimdi ınvestıtsııalyq túsim tabýy úshin qarjylyq saýatty jumys júrgizý. Áıel-analardyń zeınetke shyǵý jasyn tómendetý jaıy da qoǵamda jıi kóterilip, narazalyqtarǵa sebep bolyp kele jatqan máselelerdiń biri edi. Olardyń zeınet jasyn 2028 jylǵa deıin 61 jas deńgeıinde qaldyrý da durys boldy. Qazirgi kásibı mamandar jetimsizdigi kezeńinde úlken betburystardy birden jasaý ońaı emestigin de kópshilik túsinedi. Bul qadam Memleket basshysynyń halyqty alańdatatyn mańyzdy máselelerge qulaq asyp, únemi nazarda ustaıtynynyń bir dáleli dese bolady. Sondaı-aq, árbir aımaq pen eldi mekende bos jatqan nemese maqsatyna saı ıgerilmeı jatqan jerdi arnaıy komıssııanyń qaıtaryp alýy kásipkerlerdiń ǵana emes, jalpy ekonomıkanyń básekege qabiletin arttyra túsedi. Sot júıesine, qańtar oqıǵasyna, salyq, memlekettik tapsyrysqa qatysty taǵy basqa úlken bastamalar Ádiletti Qazaqstan qurýdyń negizgi baspaldaqtary ekeni aıqyn
», - dep topshylaıdy Bas redaktorlar klýbynyń prezıdenti Bıbigúl Jeksenbaı.
Málimdemede Memleket basshysynyń keler jyly aýyl turǵyndarynyń suranysyn qanaǵattandyrýǵa arnalǵan ulttyq jobany júzege asyrýdy tapsyrǵanyna nazar aýdarylady.
«
Aldaǵy eki jylda jyraqtaǵy aýyldarda medıtsınalyq jáne feldsherlik-akýsherlik bólimsheler salynyp, qajetti qural-jabdyqtarmen tolyq qamtamasyz etiledi. Memleket osylaısha, bir mıllıonnan astam adamnyń alǵashqy medıtsınalyq-sanıtarlyq kómek alýyna múmkindik týǵyzbaq. Bunyń ózi Prezıdenttiń ortalyqtardaǵy ǵana emes, eldiń ár qıyryndaǵy problemalardy jaqsy biletinin, olardy sheshýge tapsyrma bere otyryp shalǵaıdaǵy eldi meken turǵyndarynyń da ıgilikke bólenýine jaǵdaı jasaıtynyn naqty kórsetedi
», - dep jazylǵan málimdemede.
Bas redaktorlar klýbynyń músheleri Prezıdent Joldaýlarynan pafosqa toly áńgimeler, bitpeıtin strategııalar men alyp ýádeler jáne joba-josparlardy estip úırenip qalǵandaryn aıtady. «Al myna Joldaý Prezıdenttiń, tipti árbir balanyń taǵdyryna qatty alańdaıtynyn ashyq kórsetti. Sondaı-aq, máseleniń usaq-túıek bolyp bólinbeıtinin, memleket barlyǵyn sheshý kerek ekenin naqty uqtyrdy», - degen málimdeme avtory BAQ-taǵy áriptesterine úndeý tastaıdy.
«
Jyldar boıǵy qumǵa sińgen qur nasıhat jumysynan arylyp, Joldaýdy birlese iske asyrýǵa qatysty jýrnalısterdi de, halyqty da shaqyryp, jumyldyra alý kerek dep oılaımyn. Osy turǵyda, Bas redaktorlar klýby elimizdiń barlyq BAQ-tarymen birigip jumys isteýge daıyn. Jalǵan aqparattyń dáýiri júrip jatyr. Aqparat jasaýshy ár adam túrli medıa arqyly manıpýlıatsııa jasap, jalǵan aqpar qany jerge tambaıtyn «taýarǵa» aınaldyratynyn talaı kórip kelemiz. Qazir jańa medıa men áleýmettik jeliler qaryshtap damyp, taralyp, aıqaıǵa attan qosyp, jel sózder kóbeıip turǵan kezeń. Sondyqtan, halyqqa túsinikti oı aıtyp, shyndyqty durys jetkizý arqyly aqparattyq saýattylyǵyn arttyrý da – bizdiń negizgi mindetimiz dep oılaımyn. Árıne, osyndaı tarıhı sátte joldan qosylǵan blogerler nemese ózge aqparat daıyndaýshylar emes, naǵyz kásibı jýrnalıster jaýapkershilik júgin sezine otyryp, bul iske belsendi túrde atsalysýy tıis. Ólara kezeńde júrgendegideı kúıdegi halyqtyń erteńge nyq senimmen ári úkili úmitpen qaraýy kóbine bizdiń kásibı deńgeımiz ben Otan aldyndaǵy jaýapkershiligimizge baılanysty ekenin umytpaıyq. Sonda biz, ádiletti memleket qalyptastyryp, birtutas ultymyzdyń berekeli qoǵamda jasaýyna óz úlesimizdi qosamyz
», - dep aıaqtalady Bas redaktorlar klýbynyń málimdemesi.
Eske salsaq, 1 qyrkúıekte Memleket basshysy Qasym-Jomart Toqaev Parlament palatalarynyń birlesken otyrysynda jetinshi saılanǵan Parlamenttiń úshinshi sessııasyn ashyp, halyqqa Joldaýyn jarııalady.