Kásibı sportqa bólinip kelgen 21 mlrd teńge buqaralyq sportqa baǵyttaldy
«Elimizde orta eseppen halyqtyń 35%-ke jýyǵy sportpen shuǵyldanady. Mańǵystaý, Atyraý jáne Aqmola oblystarynyń kórsetkishteri joǵary. Al, eń tómengi kórsetkishter Nur-Sultan, Almaty jáne Shymkent qalalarynda tirkelip otyr.
2025 jyly biz sportpen aınalysatyndardyń úlesin 50%-ke deıin jetkizýimiz kerek. Ol úshin salaýatty ómir salty men sporttyń paıdasy keńinen nasıhattalýy tıis», - dedi Úkimet basshysy.
Sondaı-aq, ol sport ınfraqurylymyn damytyp, buqaralyq sportqa bólinetin qarajatty kóbeıtý kerektigin basa aıtty.
«Bul rette Memleket basshysynyń tapsyrmasy boıynsha shamamen 21 mlrd. teńgeni kásibı sport túrinen alyp, buqaralyq sportqa qaıta baǵyttadyq. Onyń 6 mlrd. teńgesi memlekettik sporttyq tapsyrysty qarjylandyrýǵa jumsaldy. Osynyń arqasynda myńdaǵan bala sport sektsııalaryna tegin barýǵa múmkindik aldy. Ótken jyly respýblıka boıynsha 162 myń bala qatysty, al bıyl 275 myńy qamtylady. Tegin shuǵyldanatyn balalardyń eń kóp úlesi Almaty qalasy men Almaty oblysynda tirkelgen. Ázirge Aqtóbe jáne Soltústik Qazaqstan oblystary kósh sońynda qalyp otyr», - dedi Álıhan Smaıylov.