Kásibı merekege oraı Bas Prokýratýranyń birqatar qyzmetkerleri synyptyq shender aldy jáne vedomstvolyq nagradalarmen marapattady

ASTANA. Búgin Bas prokýratýrada kásibı mereke - Prokýratýra kúnine arnalǵan saltanatty jıyn bolyp ótti.

«Táýelsizdik jyldary Memleket basshysynyń qoldaýynyń arqasynda prokýratýra quqyq qorǵaý júıesiniń aldyńǵy qatarly ınstıtýttarynyń birine aınaldy», - dedi jıyndy ashqan QR Bas Prokýrory Ashat Daýylbaev. Prokýratýra adam men azamattyń konstıtýtsııalyq quqyqtary men zańdy múddeleriniń tıimdi qorǵalýyn qamtamasyz etý jónindegi mańyzdy quqyqtyq ınstıtýt bola otyryp, memlekettik bılik júıesinde erekshe oryn alady.

Qadaǵalaýdyń basty baǵyttary ýaqyt talabyna saı anyqtalyp otyr. Prokýrorlyq qadaǵalaýdyń áleýmettik baǵyttylyǵyn odan ári damytý, halyqtyń materıaldyq ál-aýqatyn qamtamasyz etý, qoǵamdaǵy áleýmettik-saıası turaqtylyqty saqtaý máseleleri qyzmettiń basym baǵyttary retinde qala bermek.

Keıingi jyldary qarjy daǵdarysynan týyndaǵan zań buzýshylyqtardy joıý, azamattardyń eńbek quqyqtaryn, halyqtyń áleýmettik álsiz toptarynyń, kásipkerler men memlekettiń múddelerin qorǵaý prokýrorlardyń qashanda basty nazarynda. Sybaılas jemqorlyqpen kúresý jáne ekstremıstik qozǵalystarǵa tosqaýyl qoıý boıynsha aýqymdy sharalar iske asyrylýda.

Elimizdegi zańdylyqty nyǵaıtý boıynsha prokýratýra organdary júrgizip otyrǵan jumystar memleket tarapynan da joǵary baǵalanýda. Prokýratýra qyzmetkerleriniń áleýmettik máselelerin sheshý, eńbek jaǵdaılaryn jaqsartý jóninen birtindep júzege asyrylyp jatqan sharalar osynyń dáleli bolyp tabylady. Bıylǵy jyldyń ózinde jergilikti jerlerde prokýratýralardyń on bir ǵımaraty salynyp, paıdalanýǵa berildi jáne olarda jemisti eńbek etýge barlyq qajetti jaǵdaılar jasalǵan.

Kásibı merekeniń qurmetine oraı A. Daýylbaev ozat ta úlgili qyzmetterimen kózge túsken jáne ózine júktelgen mindetterin minsiz de tabysty atqarǵan birqatar qyzmetkerlerge synyptyq shender berdi jáne vedomstvolyq nagradalarmen marapattady. Olardyń barlyǵyna zańdylyq pen quqyqtyq tártipti qamtamasyz etý jolyndaǵy jaýapty jumystardy júzege asyrýda odan ári de jemisti jetistikterge qol jetkizýge tilektestigin bildirdi.

Saltanatty is-shara prokýratýra qyzmetkerleri ázirlegen merekelik kontsertke ulasty, dep habarlaıdy Bas prokýratýranyń baspasóz qyzmeti.