Qashyqtan oqytýdyń ekinshi aptasy: Sabaqtar qalypty jaǵdaıda ótip jatyr

NUR-SULTAN. QazAqparat – QR Bilim jáne ǵylym vıtse-mınıstri Sholpan Karınova qashyqtan oqytý aıasynda ınternet platforma arqyly bilim alyp jatqan oqýshylar týraly aıtty, dep habarlaıdy QazAqparat tilshisi.

«Tórtinshi toqsan aıasynda barlyq mektepterde qashyqtan oqytýdyń ekinshi aptasy aıaqtaldy. Onyń nátıjesinde barlyq mektepte bul jumystyń qalypty jaǵdaıda júrgizilip otyrǵanyn baıqadyq. Ózderińiz bilesizder, qashyqtan oqytýdyń birneshe formaty usynylǵan bolatyn. Osy aptanyń ishindegi derekterge qarasaq, 2,4 mln oqýshy men muǵalim ınternet platformany paıdalanyp, jumys istep otyrǵanyn kórip otyrmyz. Internet jýrnaldar júıesinde de, onyń ishinde Kúndelik júıesinde oqýshylar men muǵalimderdiń belsendi jumysy baıqaldy», - dedi vıtse-mınıstr Ortalyq kommýnıkatsııalar qyzmetindegi onlaın brıfıngide.

Onyń sózine qaraǵanda, telearnalardaǵy sabaqtardy 800 myńnan astam oqýshy kúndelikti kórip otyr.

«Muǵalimderdiń oqýshylarmen keri baılanystary da qoljetimdi quraldar arqyly jetkizilýde», - dedi Sh. Karınova.