Qashyqtan oqytýdy damytý úshin myqty ishki motıvatsııa qajet - sarapshy

ASTANA. QazAqparat - QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń sarapshysy Aıman Júsipova Jastar jylyna qatysty pikir bildirdi, dep habarlaıdy QazAqparat tilshisi.

«Jastar jyly aıasynda birqatar aýqymdy jobalardy iske asyrý josparlanyp otyr. Sonyń ishinde qashyqtan oqytý júıesin keńeıtýdi erekshe atap ótken jón. Ony barlyq joǵary oqý oryndary, kolledjder, tipti jumys berýshiler de qolǵa alýy qajet. Atalǵan bastamanyń mańyzdylyǵy sol, eń aldymen bilimniń sapasyn arttyrýǵa bolady», - deıdi A.Júsipova.

Onyń aıtýynsha, qashyqtan oqytý júıesiniń artyqshylyqtary kóp. Eń bastysy, árbir adam oqytý kestesin óz yńǵaıyna qaraı josparlaı alady. Sondaı-aq, kýrstyń mazmunyn stýdenttiń qajettiligine qaraı tolyqtyrýǵa múmkindik bar. Alaıda joǵary bilim salasynda qashyqtan oqytý kezinde myqty tártip pen ishki motıvatsııa asa qajet.

«Óz sózinde Prezıdent jumysqa ornalasýdy jastar saıasatynyń basty máselesi retinde belgiledi. Osy máseleni sheshýge iri kásiporyndar men bıznesmender atsalysýy qajet. Negizi, ondaı mehanızmniń tıimdiligi zor. Eýroodaq elderi de ondaı sharalardy qolǵa alyp jatyr. Jumys berýshiler oqytý baǵdarlamalaryn ázirleý jumysyna da qatysyp, ózine qajetti mamandardy daıarlaıdy», - dep atap kórsetti A.Júsipova.

Osy oraıda sarapshy jas mamandardyń basqa elderge ketý máselesin de qozǵady. Búginde TMD jastarynyń kóbi shetelge ketip jatady. Uıym ishindegi kóshi-qon máselesi de ózekti bolyp tur. Máselen, Qazaqstannyń jastary Reseıge baryp, bilim alyp júr. Osyǵan baılanysty elimizde bilim berý granttarynyń sanyn 20 000-ǵa artyrýǵa sheshim qabyldady. Al jataqhana oryndarynyń sany taǵy 70 000-ǵa kóbeıedi.

«Qazaqstannyń ishinde de kóshi-qonnyń deńgeıi joǵary. Aýyl jastary jumys izdep, qalaǵa kóship jatyr. Ondaı jaǵdaı aımaqtardyń ekonomıkasyna da keri áserin tıgizýde. Al qalaǵa kóship kelgen jastar jańa orynǵa beıimdelemiz dep, psıhologııalyq problemalarǵa tap bolady», - deıdi A.Júsipova.

Aıta keteıik, keshe QR Prezıdenti Nursultan Nazarbaev Jastar jylynyń ashylýyna arnalǵan resmı sharaǵa qatysty. Sol jerde Memleket basshysy birneshe tyń bastamalardy jarııalady. Máselen, aýylǵa baratyn jastardyń járdemaqysyn kóterýdi tapsyrdy. Prezıdenttiń sóılegen sózin myna jerden oqýǵa bolady.