Qashyqtan oqytý: Qostanaı oblysynda 4 myńnan astam oqýshynyń kompıýteri joq

QOSTANAI. QazAqparat – Qostanaı oblysynda oqýshylardy oqýlyqpen qamtamasyz etý úshin qomaqty qarajat bólindi. Bul týraly oblys ákimdiginde ótken apparat jıynynda belgili boldy, dep habarlaıdy QazAqparat.

Oblystyq bilim basqarmasynyń basshysy Vasılıı Tsymbalıýktyń aıtýynsha, oqý jyly bastalmaı turyp oqýshylar kompıýter jáne oqýlyqpen qamtamasyz etilýi tıis. Sonymen qatar qalalar men aýdandardyń ákimdikteri sanıtarlyq qaýipsizdik sharalaryna tikeleı jaýapty organ bolyp bekitildi.

«Búginde oblys pedagogteri úshin oblystyq kásipodaq qarajaty esebinen noýtbýktar satyp alý máselesi pysyqtalýda. Bul resýrs muǵalimder men oqýshylardyń kompıýterge degen qajettiligin jabý úshin jetkilikti. Qolda bar málimetke sáıkes, óńirde 4101 oqýshy jáne 176 pedagogte kompıýter joq. 4906 oqýshy men 805 muǵalim ınternetpen qamtamasyz etilmegen. Bulardyń deni shalǵaıdaǵy aýyldyq eldi mekenderdiń oqýshylary men pedagogteri sanalady, olarda oqytýdyń shtattyq formaty qarastyrylǵan. Jergilikti ákimder qarjylandyrýdyń ártúrli tetikterin paıdalana otyryp, árbir pedagog pen oqýshyny ınternetpen qamtamasyz etý máselesin sheshýge belsendi qatysýy qajet. Eń aldymen áleýmettik osal otbasylar basty nazarda bolýy tıis», - dedi basqarma basshysy.

Aıta keteıik, Bilim jáne ǵylym mınıstri Ashat Aımaǵambetov 2020-2021 oqý jylynyń 1 toqsanynda bilim berý protsesin uıymdastyrýdyń negizgi tásilderin belgiledi. Soǵan súıensek, qashyqtan oqytý formatyna qaramastan, árbir oqýshy oqýlyqpen qamtamasyz etilýi tıis.

Bul jumys Qostanaı oblysynda keshendi túrde sheshiledi. Oqýlyq pen oqý-ádistemelik kitaptardy satyp alýǵa shamamen 1,2 mlrd teńge bólingen, baspalarmen jáne tasymaldaýshylarmen tolyq kólemde shart jasaldy.

Oqýlyqty oblys mektepterine jetkizý osy jyldyń 25 tamyzynda aıaqtalady.