Qashyqtan oqytý: Bilim mınıstrliginiń usynysy Úkimette qaralady

NUR-SULTAN. QazAqparat - QR Bilim jáne ǵylym mınıstrligi balalardy shtattyq rejımde oqytý boıynsha usynys ázirledi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Pandemııa bastalǵannan beri 2,4 myńnan astam qazaqstandyq bala koronavırýspen aýyrdy. Búginde 34 bala em alyp jatyr. Osyndaı jaǵdaıdaǵy Úkimettiń mindeti – jalpy qaýipti vırýstan balalardy jáne qazaqstandyqtardy barynsha qaýipsizdendirý. Tipti balalar koronavırýsty jeńil formada bastan ótkizgenimen eresekter táýekel aýmaǵynda bolady. Olar keıinnen tóńiregine vırýs taratýy jáne ınfektsııanyń jańa oshaqtaryn týdyrýy múmkin. Mundaı jaıt tájirıbeden-aq belgili. Osyǵan oraı oqý jylynyń 1-toqsanynda oqýshylardyń negizgi bóligin qashyqtan oqytýǵa kóshirý týraly sheshim qabyldandy», - dedi Eraly Toǵjanov Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, búginde álemde 100-den astam el balalarǵa qashyqtan bilim berip jatyr.

«Qazaqstanda 3,4 mln oqýshy bar. Onyń 77 paıyzy qashyqtan oqytý formatynda bilim alýdy bastady. Epıdemıologııalyq ahýaldy eskere otyryp, birinshi kezeńde jalpy kontıngenti 800 myń oqýshyny quraıtyn kezekshi synyptardy jáne shaǵyn jınaqty mektepterdi ashtyq. Búginde Bilim jáne ǵylym mınıstrligi ekinshi kezeńde mektep jumysyn shtattyq rejımde jańartý boıynsha usynys ázirledi. Bilim jáne ǵylym, Densaýlyq saqtaý mınıstrlikterinen kelip túsetin barlyq usynystar Úkimette jan-jaqty ári tyńǵylyqty qaralady. Olar boıynsha eń aldymen qazaqstandyqtardyń múddesine jáne balalardyń qaýipsizdigine saı keletin teńgerimdi sheshim qabyldanady», - dedi Eraly Toǵjanov.