Qashyqtan oqytý: Agenttik noýtbýk pen planshetke bólingen qarajattyń 3 mlrd teńgesin únemdedi
15:33, 18 Qyrkúıek 2020
NUR-SULTAN. QazAqparat – QR Sybaılas jemqorlyqqa qarsy is-qımyl agenttigi qashyqtan oqytýdy uıymdastyrý úshin kerekti noýtbýkter men planshetterge, kompıýterlerge 70 mlrd teńgeniń bólinýine taldaý júrgizdi, dep habarlaıdy QazAqparat tilshisi.
«Bilim jáne ǵylym mınıstrligi qashyqtan oqytýǵa arnalǵan kompıýterlerdi, noýtbýkter men planshetterdi satyp alý máselesin baqylaýdy ótingen edi. Búgingi kúni jergilikti atqarýshy organdarymen júrgiziletin aldyn alý jumysy - tıimdilik kórsetkishi bolyp otyr», - dedi QR Sybaılas jemqorlyqqa qarsy is-qımyl agenttigi preventsııa departamentiniń asa mańyzdy ister jónindegi ofıtseri Aınagúl Káripova onlaın rejımdegi baspasóz máslıhatynda.
Onyń aıtýynsha, bul qajettilik úshin Úkimet qorynan 70 mlrd teńgeden astam qarajat bólingen.
«Bizdiń qyzmetkerlerimizdiń qatysýymen jumys toptary, qoǵamdyq komıssııalar satyp alynatyn uıymdastyrý tehnıkasynyń baǵasyn tómendetip, 3 mlrd teńge únemdedi», - dedi ol.