Qashyqtan oqý: Memlekettik aýdıt SQO-da 177 noýtbýkty tappaı qaldy

NUR-SULTAN. QazAqparat – Memlekettik aýdıt ókilderi Soltústik Qazaqstan oblysynyń Aıyrtaý aýdanynda qashyqtan bilim berý úshin satyp alynǵan 177 noýtbýkty tappaı qaldy. Bul týraly QR Qarjy mınıstrliginen málim etti, dep habarlaıdy QazAqparat.

Málim etilgendeı, mınıstrliktiń Soltústik Qazaqstan oblysy boıynsha Іshki memlekettik aýdıt departamenti 6 obektide júrgizilgen aýdıtti aıaqtady.

«Aıyrtaý aýdany ákimdiginiń bilim bóliminde aýdandyq mektep oqýshylaryn qashyqtan oqytýǵa respýblıkalyq bıýdjet esebinen jalpy somasy 28 mln teńgege satyp alynǵan 177 noýtbýktyń jetispeıtini anyqtaldy. Tapshylyqtyń sebebi – negizgi quraldardyń saqtalýy men durys paıdalanylýyn nashar baqylaý. Aýdıt materıaldary quqyq qorǵaý organdaryna berildi», - dedi vedomstvodan.

Jalpy, 6 nysanda júrgizilgen aýdıtorlyq is-sharalar barysynda 80 268,7 mıllıon teńge somasyn quraıtyn buzýshylyqtar anyqtaldy. Onyń ishinde qarjylyq buzýshylyqtar – 39 119,6 mıllıon teńge, protsessýaldyq buzýshylyqtar – 41 149,1 mıllıon teńge.

«4 obektide býhgalterlik esep pen qarjylyq eseptilik jalpy zańnama talaptaryna sáıkes keledi. Al 2 obektide eleýli buzýshylyqtarmen júrgizilip kelgen.

Qarjylyq eseptiliktiń aýdıti qarjylyq eseptiliktiń senimdiligin, durystyǵyn, býhgalterlik esep pen qarjylyq jaǵdaıyn baǵalaý maqsatynda júrgizildi», - dedi mınıstrlikten.