Qashyqtan oqý kezinde oqýshyǵa úı tapsyrmasy berile me

ALMATY. QazAqparat – Oqýshylarǵa onlaın bilim alý kezinde úıge tapsyrma meılinshe az beriledi. Muǵalimder men oqýshylar tapsyrmany sabaq barysynda oryndaýy tıis. Bul týraly onlaın brıfıng barysynda Almaty qalalyq Bilim basqarmasynyń jalpy orta bilim berý bóliminiń basshysy Aqmaral Aıtýarova aıtty, dep habarlaıdy QazAqparat tilshisi.

Almaty qalasy Bilim basqarmasy jalpy orta bilim berý bóliminiń basshysy Aqmaral Aıtýarovanyń aıtýynsha, dástúrli tamyz konferentsııasynda mektep dırektorlaryna úı tapsyrmasy týraly nusqaýlar berildi.

« Oqýshylarǵa úı tapsyrmasy múldem berilmeıdi degen sóz joq. Tapsyrmanyń kólemi meıilinshe shekteledi. Negizi sabaqta oryndaǵan jón. Bul oqýshy úshin de, muǵalim úshin de tıimdi dep sheshtik»,- deıdi Aqmaral Aıtýarova.

Onyń aıtýynsha, tamyz aıynda 15 myńnan asa muǵalim Kundelik.kz, Bilimland.kz, Microsoft.Teams bilim berý platformalaryn oqý protsesinde qoldaný boıynsha kýrstan ótti. Sonymen qatar bilim jáne ǵylym mınıstrliginiń usynysy boıynsha qala mektepterinde 19 tamyzda «Biryńǵaı pedagogıkalyq keńes» ótti. 1 qyrkúıekte 279 mektepte onlaın rejımde bilim kúnine arnalǵan sabaqtar ótkizildi.