«Qashqyn «qalamgerlerdiń» qarymdy tulǵasy» - BAQ-qa sholý
***
Qaı salada da árkez álemdi tamsandyryp, talǵam turǵysynan talaıdy tańǵaldyrǵan Astana endi jahan mádenıetiniń máıegi sanalǵan opera óneriniń de altyn ordasyna aınalmaq. Ondaı bıik ónerdiń oshaǵy sanaýly kúnderden soń saltanatty túrde ashylatyn «Astana Opera» teatry bolmaq. Bul jaıynda «Egemen Qazaqstan» gazetiniń búgingi sanyndaǵy «Tórtkúl dúnıeni tamsandyrar teatr» degen taqyryptaǵy maqalada baıan etilgen. Basylymnyń atap ótýinshe, keshe Premer-Mınıstr Serik Ahmetovtiń tóraǵalyǵymen ótken Úkimet otyrysynda «Astana Opera» teatrynyń jaı-kúıi, ashylý saltanatyna daıyndyǵy, jalpy, ózekti máseleleri talqylandy. Qazaq mádenıetiniń biregeı belesi, bul salada baǵyndyrǵan bıiginiń bir ólshemi bolǵaly otyrǵan óner ordasy jaıynda otyrysta Mádenıet jáne aqparat mınıstri Muhtar Qul-Muhammed baıandady. «Mádenıet jáne aqparat mınıstri baıandamasynyń qorytyndysynda sheshimin kútken ózekti máselelerge de toqtalyp ótti. Aldymen teatrdyń óz deńgeıinde, álemdik standartqa saı jumys isteýine qajetti qarajat máselesi ózekti deıdi ol. Mınıstrdiń aıtýynsha, kelesi jyldan bastap teatr jyl saıyn kórermen nazaryna 2 opera, 2 balet jańalap usynyp otyrmaq. Jańalap deýimizdiń mánisi, buryn repertýarda bar qyryqqa jýyq qoıylymdy endi jańa sahnaǵa, jańa standartqa, bıik deńgeıdegi, joǵary talǵamǵa saı etip, qaıta jandandyrmaq», - dep jazady basylym.
«Egemen Qazaqstan» gazetiniń búgingi sanynda elimizdiń qashqyn sheneýnigi, Almaty qalasynyń burynǵy ákimi Vıktor Hrapýnov jaıyndaǵy maqala «Qashqyn «qalamgerlerdiń» qarymdy tulǵasy» degen taqyryppen berilgen. «Qazaqstandyq sheneýnikter men olıgarhtar qarap júrmeı, qylmysqa urynyp, aıaqtaryn bylyqqa batyryp alǵannan keıin dereý shetel asyp ketýdi búginde ábden daǵdyǵa aınaldyryp alǵan. Bir ǵajaby, solardyń barlyǵy da jatjurttyqtardyń arasyna baryp jaıǵasyp alǵan soń, buryn elde júrgende bastaryna da kelmegen tirlikke tirek tastap, aıaq astynan demokratııa úshin kúresker hám lıberaldyq qundylyqtardy qorǵaýshy bolyp shyǵa keledi. Taǵy bir ǵajaby, solardyń bári de ózderi endigi qonysy etip alǵan dáýlettiń dáýrenine qaraı júginip, barynsha solardyń tilimen sóıleýge umtylyp baǵady», - dep jazady basylym.
***
Úkimet pen Ulttyq banktiń jańa zeınetaqy zańnamasyn Parlament qabyrǵasynda qorǵaýy kezinde qoǵamda týyndaǵan qyzý pikirtalastarǵa da qaramastan, eki palatanyń qoldaýyna ıe bolyp, Elbasyǵa qol qoıýǵa jiberilgen-di. Artynan Prezıdent Nursultan Nazarbaev atalǵan zańdyq qujatqa baılanysty arnaıy Úndeý jarııalap, jaǵdaıǵa túsinik berdi. Osy rette «Aıqyn» gazeti pikirin bilmek nıetpen kásipodaqtar federatsııasynyń tóraǵasy Ábilǵazy Qusaıynovty áńgimege tartqan. Basylymnyń saýaldaryna tuşymdy jaýap bergen ol: «Árıne, Elbasynyń máseleni jan-jaqty saraptap, durys sheshim qabyldaǵany kúmánsiz. Óıtkeni Prezıdentke tek bizden ǵana emes, turǵyndardan, sarapshylar men ǵalymdardan aqparattar jan-jaqtan kelip túsip jatady. Sonyń barlyǵyn eskere kelip, áıel azamattarymyzdyń zeınet jasyn kóterýdi 2014 jyldyń 1 qańtarynan emes, tórt jylǵa keıin shegerýdi usyndy. Nursultan Nazarbaev qoǵamnyń buǵan daıyndyǵy joqtyǵyn qaperge ala otyryp, osyndaı sheshimge bardy. Úkimetke 2030 jylǵa deıin zeınetkerlikpen qamtamasyz etý júıesin odan ári jetildirýge arnaıy tapsyrma bergeni sondyqtan dep oılaımyn.Sebebi alda tórt jyl bar», - deıdi. Suhbat «Kásipodaqtar Elbasy úndeýin qoldaıdy» degen taqyryppen berilgen.
Almatydaǵy Qazaqstan baspasóz klýbynda BAQ ókilderimen ótken baspasóz máslıhatynda «SulýNur» korporatsııasynyń tóraǵasy Saǵadat Ábdiǵapar myrza ózi basqaryp otyrǵan korporatsııaǵa qatysty sot sheshiminiń ádiletsizdigine kúıip júrgenin ashyna jetkizdi. Bul jaıynda «Aıqyn» gazetiniń sársenbilik sanyndaǵy «Kásipkerdi qyspaqqa alǵan kim?» degen taqyryptaǵy maqalada keńinen baıandalǵan. Kásiporyn ıesiniń aıtýynsha, «SulýNur» fırmasy álemdegi eń arzan ári densaýlyqqa eshqandaı zııany joq jáne elektr qýatyn áldeqaıda az jumsaıtyn jaryq dıodty lampalar men shamdardy shyǵarady. Ónimderi de naryqta mol suranysqa ıe. Degenmen sońǵy úsh jyl boıy kásiporyn basshysy ádildik izdep sharq uryp júr. «Óıtkeni «SulýNur» sapa belgisimen jaryq dıodty shamdardyń otandyq ınnovatsııalyq, sertıfıkattalǵan ónimin shyǵaratyn «AKKA Tes» JShS 2010 jyldan bastap reıderlik jolmen basyp alý maqsatyndaǵy alaıaqtyqqa tap boldyq. BAQ betterinde aty shyqqan «Galıanos» oıyn-saýyq klýbynyń ıeleri «Le Vendom» qonaqúıi kesheni (JShS) seriktestigi túrindegi reıderler óz maqsattaryna jetý úshin jal-ǵan qujattar boıynsha astyrtyn árekettermen jáne aldaý jolymen quny 10 mıllıon AQSh dollary turatyn ınnovatsııalyq kásiporyndy óte arzan baǵaǵa ıelenip aldy», - deıdi S.Ábdiǵapar.